Folketingimi ilaasortat: Misissuisoqarnissaa iluarisimaarparput

Kalaallit Nunaata 1953-imi nunasiaanermit naalagaaffeqataalernerani pisimasut pillugit Folketingimi atlantikup avannaani suleqatigiit namminneerlutik siorna misissuisitsinerat, maanna pisortatigoortumik qulaajaasoqarnissaannik isumaqatigiissummik kinguneqarpoq. Oqaluttuarisaanermik ilisimasallit misissuissasut naalakkersuisut siulittaasuata Hans Enoksenip aamma statsminister Anders Fogh Rasmussenip ullumi isumaqatigiissutigaat, tamannalu Folketingimi ilaasortat nunatsinneersut iluarisimaarpaat.

Inuit Ataqatigiinneersoq Kuupik Kleist ima naliliivoq:

- Uagut siorna nalunaarusiarititarisimasagut eqqortuusimasut taamaalilluni uppernarsarneqarpoq, pingaartumik isornartorsiorneqangaatsiarsimaneri eqqarsaatigalugit. Ajunngitsumik sulisimasugut uppernarsarneqarmat iluarisimaaqaara, naak paasissutissanik nutaanik saqqummertoqarnissaa ilimagivallaanngikkaluarlugu. Kuupik Kleist oqarpoq.

Folketingimi ilaasortat nunatsinneersut aappaata Siumumeersup Lars-Emil Johansenip naalakkersuisut qulaajaasoqarnissaanut isumaqatigiissuteqarnerat aamma iluarisimaarpaa.

Misissuisussatut toqqarneqarsimasoq Dansk Institut for Internationale Studier, tassalu nunanut tamalaanut tunngassutilinnut institutti qulaajaasussatut suliakkinneqarsimavoq, taassumalu suliai aappaagu ukiakkut naammassereersimassangatinneqarput. Paasissutissat sumut atorneqassanersut pillugit Lars-Emil Johansen aperaarput:

- Naluneqanngitsumik nunarput naalakkersuinikkut ineriartoqqinnissamik maanna oqalliffiuvoq. Namminersulernissap tungaanut nammineerneruleriartornermullu oqalliffiulluni. Minnerunngitsumik Danmarkip nunattalu suliassami tassani ikinngutigiittut suleqatigiillutik saqqummiunneqarumaartussat atorlugit akaareqatigiillutik paaseqatigiillutillu naalakkersuinikkut angusaqarnissaannut aqqutissiuussisuujumaartut. Lars-Emil Johansen nassuiaavoq.

Kalaallit Nunaata 1953-imi nunasiaanermit naalagaaffeqataalerneranut oqallinneq aallartippoq, Folketingimi ilaasortat altantikup avannaaneersut siorna nalunaarusiortitsimmata, nunatta nunasiaajunnaarnissaanut isumaqatigiinniarnernut atatillugu Danmarkip nunatsinnut paasissutissanik isertuussisimatut imalimmik.

Dansk institut for internationale studier, tassalu Danmarkimi nunat tamalaanut tunngasunut instituttimit suleriaasissaq pillugu oqaaseqartitsiniaraluaratta iluatsinngilarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat