Folketingimi ilaasortaatitaqarneq aalajangiiffigineqartariaqarpoq

Lars-Emil Johansen aperaarput narrassimaarnersoq imaluunniit Kalaallit Nunaat namminersortoq tikinnialersaarneraa? Akivorlu:-Tassa uannut inuttannut tunngassuteqanngilaq, taamaattumik narrassimaarnermik tunngaveqanngilaq, kisianni oqaluuseritinniagara unaavoq, nunarput namminersuleriartormat aamma namminersulivikkiartormat isummerfigissallugu piffissanngunnginnersoq folketingimi ilaasortaatitaqarnitta naajartuaarnissaa.

Sooq folketingimi ilaasortatitaqarunnaarnissaq ilaatigut imak tunngavilersorneqarpoq Lars-Emil Johansen-imit:- Soorunami makkua ilapittuutaapput oqaatsit kusananngitsut uagutsinnut atorneqartut, sermersuarmiit aqqarlutagooq taasiartortugut, nunatsinnigooq ajornartorsiutigut aaqqinniartsigit Danmarkimut akulersuunnata.

Kunngeqarfiup Danmarkip tunngaviusumik inatsisaani allaqqavoq Kalaallit Nunaat Folketingimi marlunnik ilaasortaatitaqassasoq. Tamannalu aatsaat allanngortinneqarsinnaavoq inatsisip tunngaviusup allanngortinneratigut. Allanngortinneqassagaluarpat naalagaaffeqatigiinnerlu attatiinnarneqassagaluarpat akisussaafiit assigiinngitsut qanoq aaqqiivigineqartarnissaat imak Lars-Emil Johansen-ip saqqummiuppai:-Isumaqarpunga nunatsinni naalakkersuisut taavalu Danmarkimi naalakkersuisut apeqqutit sinneruttut nunatsinnit suli tiguneqarsimanngitsut pillugit isumaqatigiinngiartarnissaat ilusilerneqarsinnasoq, uanga nammineq folketingimut ilaasortaanera qimalersaanngilara imaalitsiaannarlunga kisianni oqalliseqataffigerusuppara qanoq ililluni Kalaallit Nunaata Folketingimi ilaasortatitaqarnera taamaatinneqarsinnaanersoq piffissami ungasippallaanngitsumi.

Naggasiullugu Lars-Emil Johansen oqarpoq ukiualunnguit ingerlaneranni Kalaallit Nunaata Folketingimi ilaasortaatitaqarnera aalajangiiffigineqartariaqartoq.