Folketingimi ataatsimiititaliat ilaat Ilulissaniippoq
Folketingip nunarput pillugu ataatsimiititaliaanni ilaasortat Nuummut ullumi tikissapput nunatsinni oqartussaasut paasisassarsiorfigalugit, ilaatigut namminersulivinnissaq nunaqarfinnilu nungutsaaliuillunilu piniartarnerit kiisalu arfanniartarneq pillugu oqaloqatiginnissallutik.
Folketingip nunarput pillugu ataatsimiititaliaata 16-inik politikerinik ilaasortallip Namminersulernissaq pillugu Isumalioqatigiissitaq aamma naapisimaassavaat.
Ataatsimiititaliaq pingasunngorpat Ilulissanut ingerlaqqissaaq tamaani pinngortitap allanngoriartornera nammineq isiminnik takuniarlugu.
Aammattaaq takornariartitsineq pillugu oqaloqatiginnissapput, Ilulissaniinnerminnilu takornariassallutik.
Kalaallit folketingimut ilaasortaatitaat marluk Kuupik Kleist kiisalu Lars-Emil Johansen angalaqataassapput. Kuupik Kleist ataatsimiitsitaliami siulittaasutut.
Ukioq allortarlugu folketingip nunatsinnut tunngasunut ataatsimiititaliaa nunatsinnukartarpoq pisut assigiinngitsut malinnaaffigiartorlugit. Angalasut 18-jupput, politikerit angalasut atorfilinnik marlunnik ingiaqateqaramik.
