Folketingimi ataatsimiinneq ullumi ammarneqassaaq
Folketingimilu ilaasortat aasaanerani sulinngiffeqalernissaq sioqqullugu inissisimanerat allanngungaatsiarsimavoq.
Siumut sinnerlugu maannamut ilaasortaasimasoq Aleqa Hammond, attaviitsutut maanna inissisimavoq, Folketingip kreditkortianik nammineq atugassaminut 13.000 koruuningajannik atuisimanini pillugu attaviitsunngorluni. Aleqa Hammondip akiliummik taama atuisimanini pillugu Siumumit ukioq manna aggustimi tunuartitaavoq.
Taamaattoq Aleqa Hammond Folketingip Kalaallit Nunaannut tunngasunut ataatsimiititaliaani siulittaasup tulliatut inissisimaannassaaq, soorlu aamma Nunat Avannarliit Siunnersuisoqatigiiffianni sinniisuutitatut issiaannassasoq. Socialdemokratit tapersersuinerisigut tamanna periarfissaalerpoq.
Inatsisit pillugit ataatsimiititaliami, nunanut allanut tunngasunut ataatsimiititaliami, illersornissamut ataatsimiititaliamilu ilaasortaanini annaavai, soorlu aamma Folketingip nunanut allanut tunngasunut aalajangiisartuini issiavini annaagaa. Socialdemokratilli isumaqatigiissusiorfiginerisigut Kalaallit Nunaannut tunngasunut eqqartuisoqassappat ataatsimeeqataasarsinnaassaaq.
Folketingimi ataatsimiititaliani inissititernerit aqagu pingasunngornermi pisussatut pilersaarutigineqarput, Folketingimilu ataatsimiinnerup ammarneqarnerani oqallinneq pisarneq naapertorlugu sisamanngorpat pisussatut pilersaarutigineqarluni.
