Folketingimi ammaanersiortoqarmat Kalaallit Nunaanneersut peqataapput
- Oqaluttuarisaanermut takussutissatullusooq, Folketingimut ilaasortaasimasoq, Namminersornerulluni Oqartussanut partinullu Siumumut tunngaviliisut ilaat Moses Olsen qanittukkut toqukkut qimaguppoq.
Oqaatigaara takussutissatullusooq, tassami Moorsisip oqaluttuarisaaneq maani Folketingimi aallarnigaa, maanna kinguneqarmat, nunatsinnut – aammami Kalaallit Nunaata Danmarkillu akornanni attaveqaqatigiinnermut nutaamik aaqqissuussinissamik siunnersuummik, Lars-Emil Johansen oqarpoq.
Juliane Henningsenip oqaaseqarnermini aningaasarsiornikkut ajornartorsiorneq tamatumalu Islandimut kingunerisa, naalagaaffeqatigiinnermut akunnattoornartui qallunaat politikeriinut nassuiaatigai.
- Ukiormanna novembarip 25-anni Namminersorneq pillugu taasissaagut. Naatsumik oqaatigalugu kiffaanngissuseqarnerulernissarput akisussaassuseqarnerulernissarpullu pillugit taasissaagut. Tamanna sapiissuseqarnissamik pisariaqartitsivoq, ingammik maanna aningaasarsiornikkut ajornartorsiornerup qunusaarisutut inissisimaleruttorfiani. Nunatsinni ataatsimiisitsinerni peqataaffigisartakkanni namminersulernissap kalaaleqatinnit qujanartumik soqutigineqarluarnera maluginiarpara. Taamatut soqutiginninneq tassaasoraara naalagaaffeqatigiinnerup allannguiffigineqarnissaanik kalaallit akornanni pisariaqartitsisoqarneranik, Juliane Henningsen oqarpoq.