Folketingi issittumut ataatsimiititaliamik pilersitsiniartoq
Angalasartunik ataatsimiititaliornermi Folketingip Issittoq pillugu sulinerata kipisuinnerulernissaa Issittumilu sulianut sunniuteqarsinnaanerulernissaq siunertaasoq, siunnersuummi allassimavoq.
Issittoq pillugu Nunani Avannarlerni Siunnersuisooqatigiinnut angalasartut ataanni Issittoq pillugu 2011-mili suleqatigiissitaliaqarpoq, taavalu aamma Kalaallit Nunaat Savalimmiullu pillugit ataatsimiititaliat Issittumut suliat ilaannik suliaqarlutik.
AAMMA ATUARUK Issittumi suleqatigiinneq sakkutuunik amerlisaanermit aporfilersugaasoq
Issittorli pillugu angalasartunik ataatsimiititaliaqalerpat, Issittoq pillugu siammasinnerusumik sulisinnaaneq periarfissaalissaaq, assersuutigalugu avatangiisit sillimaniarnerlu politikki pillugu suliaqarnermi.
- Folketingip issittumut tunngasunut suliaminik pingaarnerutitsilernissaanut tapersiisoqarluarnera nuannaarutigaara. Issittumut ataatsimiititaliaqalerneratigut amerlanerusut suliamut pulammassimanerulernissaat politikkikkullu peqataalernissaat qulakkiissavarput, Nunat Avannarliit Siunnersuisooqatigiivinut angalasartut siulittaasuat siunnersuuteqartunilu oqaaseqartartoq, Henrik Dam Kristensen (S) oqarpoq.
AAMMA ATUARUK Ilisimatusarfik nutaaq Issittumilu nakkutiginninnerulerneq
Ataatsimiititaliaq angalasartoq aqqaneq-marlunnik ilaasortaqassaaq, siunnersuuteqartullu Folketingimi ilaasortat kalaallit savalimmiormiullu tassani ilaasortaalernissaat pissusissamisoorsoraat.
Siunnersuut decembarip 20-anni aappassaaneerneqassaaq akuerineqassappallu Folketingimut qinersisoqarnerata kingorna ilaasortassat toqqarneqassallutik.
Norge Finlandilu inatsisartui assigusunik ataatsimiititaliaqarput.
AAMMA ATUARUK Issittumi aalisarneq pillugu isumaqatigiissut atsioqatigiissutigineqartoq
