Folketingi ataatsimeeqqilerpoq
Ministeriunerup Anders Fogh Rasmussen-ip folketingimik ammaanersiorluni Danmarkimi ulloqeqqartoq oqalugiarpoq. Oqalugiaammini oqaatigaa naalagaaffeqatigiinnerup ineriartortuarnissaa naalakkersuisut pingaartikkaat oqarpormi:
Naalakkersuisut tunaartaraat Kalaallit Nunaanni Savalimmiunilu innuttaasut nammineq atukkaminnik akisussaaffeqaleriartuinnarnissaat. Suleqatitta Rosa Thorsen-ip Namminersulernissamut isumalioqatigiissitamut ilaasortat katiternissat pillugu aperaa.
- Ulluni qaninnerni tamanna aalajangiiffigineqarumaarpoq, ilimagaara partiit qinigaasut akuerereerpatigik tamanna aalajangerumaaraat, tamannalu pingasunngorpat pissaaq. Qinikkat akuerineqareerpata partiit kikkut Namminersorneq pillugu Ataatsimiititaliarsuarmut ilaasortanngortissanerlugit aalajangissavaat, naqissuserusupparali ilaasortatoqqat ilaasortaaginnassappata taarsissappataluunniit naalakkersuisut innersuussutigissagaat suliap sukkanerpaaq atorlugu inaarneqarnissaa.
Ilaasortatoqqammi?
Tassa aalajangiiffigineqanngilaq nutaanik toqqaasoqassanersoq imaluunniit ilaasortatoqqat ilaasortaaginnassanersut, tamanna partiit ulluni qaninnerni aalajangissavat. Paasisakkali naapertorlugit partiit utaqqimaaqqaarniarpaat qinigaasut ilaasortatut akuerineqarnissaat, tamannalu aqagu pissaaq.
Taamaattoqareerpallu Namminersorneq pillugu Ataatsimiititaliarsuarmut ilaasortassat partiinit toqqarneqarumaarput.
Ny Alliance peqataassava?
Isumaqarpunga Folketingimi partiit tamarmik ilaasariaqartut, kisianni ilumoorputit partiimik nutaamik ilannguttoqarnerani, apeqqummik aalajangiiffigisariaqakkatsinnik saqqummertoqartoq. Tassa taanna ulluni qaninnerni oqallisigineqarumaarpoq.
Birthe Rønn Hornbech nunasisut inuiaqatigiinnut ilanngunnissaannut ilageeqarnermullu ministerinngortoq nalunaarpoq isumalioqatigiissitamut ilaasortaajunnaartariaqarluni.
Ammaanersiornermi oqalugiaammini ministeriunerup partiinik amerlasuunik suleqateqarnissaq ujartorpaa, naalakkersuinerullu tunngavissaa saqqummiullugu.
Nappaatinut toqqutaasartunut, tassa kræfteqartarnermut uummatikkullu nappaateqartarnermut, immikkut iliuuseqarnissaq anguniagassatut oqaatigaa. Nunasisut qimaasullu atugaasa paasiniarnissaannik ataatsimiititaliornissaq pissaaq.
Dansk Folkepartip suleqataalluarneranik ministeriunerup ammaanersiornermi qutsavigaa, Ny Alliancemillu suleqateqarlualernissartik kissaatigalugu.
