Folketingep nunanut allanut tunngasunut ataatsimiititaliaata angalaneranut Doris peqataassaaq
Angalanerminni siullertut Washingtoniliassapput, tassani ataatsimiititaliami ilaasortat USA-p issittumut politikkia pillugu - taamatullu isumannaallissaanermut, ilisimatuussutsikkut aamma pilersaarusiornermik ineriartoritsinermut tunngasunik paasissutissiiffigineqassapput.
Amerikami pisortat allaffeqarfiineersut, tassa nunanut allanut tunngasunut ministereqarfimmeersut aamma illersornissamut ministereqarfimmeersut kiisalu Præsidentip Illorsuaneersut paasissutissiissapput.
Taakkua saniatigut Ruslandip Ukrainellu akornanni pisut pillugit, Irak pillugu aamma Kangiani Qiterlermi pisut kingulliit kiisalu Syriami aamma Israelimi kiisalu Palæstinami eqqissiviilliornerit pillugit USA-p isumaanik ataatsimiititaliaq saqqummiussiffigineqassalluni.
Ataatsimiititaliap Washingtonimiinnerani Kalaallit Nunaata USA-mi aallartitaatut atorfineqqammersoq Inuuteq Holm Olsen ataatsimeeqatigineqassaaq, taassuma Kalaallit Nunaat sinnerlugu USA-mi sullissisinini ataatsimiititaliamut paasissutissiissutigissavaa.
Ataatsimiititaliami ilaasortat Washingtonimeereerunik Canadami illoqarfiit pingaarnersaannut Ottawamut ingerlaqqissapput tassanngaanniillu Iqalunnukassallutik.
Folketingep nunanut allanut tunngasunut ataatsimiititaliaata angalanini naggaserlugu Ruslandimi Murmanskiliassapput. Tassani russit sakkutuuisa sorsuutaat talittarfeqarput.