Folketingemi kalaallit oqalugiaataannut apeqquteqartoq ataasiinnaavoq
Danmarkimi suleqatitta Martine Lind Krebs-ip folketinge-mi ilaasortat Doris Jakobsen aamma Johan Lund Olsen oqalugiarmata malinnaafigai
Kalaallit Nunaat sinnerlugu folketingemi ilaasortaatitaasa oqaaseqarnerisa kingorna apeqquteqartut ingasagisassaanngillat. Folketingemi ilaasortaq ataaseq kisimi apeqquteqarpoq, tassalu venstret politikkikkut oqaaseqartittagaat Ellen Thrane Nørby taassuma uran pillugu paasisaqarusulluni apeqquteqarpoq.
Kalaallit folketingemi ilaasortaatitaat oqalugiarnerminni annertunerusunik avoqqaarisaqanngillat
- Naalagaaffeqatigiit oqaluttuarisaaneranni maannakkut ajornartorsiorpugut, Savalimmiut EU-mit niuernikkut mattussaaneratigut Danmark tapersersuivoq. Arfanniarneq pillugu nunat tamat isumaqatigiissutaat atorunnaarsinniarlugu danskit naalakkersuisui aarlerisaaripput taamaaliortoqarniarporlu Kalaallit Nunaata tamanna piumasarinngikaa. Ataatsimoorlutalu siunissami qanoq suleqatigiissanersugut erseqqinnanni, Doris Jakobsen folketingep oqaluttuarfiani oqalugiarami taama oqarpoq.
Johan Lund Olsen danskit aningasanut inatsisissatut siunnersuutaannut sakkortuumik isornartorsiuivoq.
Danskit aningaasanut inatsisissatut siunnersuutaat 2014-mut atuuttoq kalaallit isaannit atuarlugu nikallunganarpoq. Nikallunganarpoq arriitsumik sulisoqarsimanera malunnarmat, naak ajornartorsiutit assiigiinngitsut Inuit Ataqatigiinnit danskit naalakkersuisuinut saqqummiunneqarsimagaluartut
Kalaallit folketinge-mi ilaasortaatitaat oqaaseqarnerminni uran pillugu annerusunik oqaaseqarput
Uran-imut akuersaanngilluinnarnerup atorunnaarsinneqarnissaanut siunnersuut akerleralugu Johan Lund Olsen oqalugiarnermi annersaani oqaaseqarpoq.
- Naalagaaffeqatigiinnerup tamarmiusup uran-imut politikkia pineqartoq, Johan Lund Olsen oqarpoq. Kalaallit folketinge-mi ilaasortaatitaasa oqaasiinut ministeriuneq akissuteqarluni ima oqarpoq.
Uran pillugu apeqqut ataatsimiittarfimmi uani oqallisigineqarnera pissusissamisoortusoq isumaqarpunga, Kalaallit nunaannit uran avammut tunisassiarineqarsinaaneranut apeqqut nutaajuvoq tamannalu pillugu soorunalimi isummerfigisussaavarput, Helle Thorning Schmidt oqarpoq.
Pingaaruteqarluinnartoq tassaavoq Kalaallit Nunaata Danmarkillu maanna isumaqatigiissutigimmasuuk uran pillugu ataatsimoorluta pisariitsumik aaqqissuulluakkamillu suleqatigiissagatta sulinerlu tamanna ingerlaqqissaaq, ministeriuneq Helle Thorning Schmidt oqarpoq.
Folketingemi ataatsimiinnerup ammarnersiorneqarneranut atatillugu folketinge-mi oqallinneq pillugu aqagu radioaviiseqarnitsinni ilanngutassiassaqassaaq.