Assi: Anders Hviid/ft.dk

VIDEO Folketingemi amerlanerussuteqartut Nunatta akisussaaffii ataqqivaat

Nunatta isumaginninnermut tunngasut, taamaalillunilu meeqqat inuusuttullu toqqissisimasumik atugaqarlutik peroriartornissaat, akisussaaffigigaa Danmarkip ataqqivaa.

Danskit isumaginninnermut ministeriata Folketingemi ullumi kalaallit meerartaasa atugarisaat pillugit oqallittoqarnerani tamanna aalajangiusimavaa. Akisussaaffimmik arsaarnagit maanna Danmarkip Nunatsinnik suleqateqarnini sukannernerulersippaa.

Dansk Folkepartiip piumasarigaluarpaa danskit naalakkersuisuisa Nunatsinni isumaginninnermut tunngasunut akisussaaffik tigussagaa.

Ukiut ingerlanerini nalunaarusiat assigiinngitsut ersersittarpaat kalaallit meerartai amerlavallaarujussuartut kinguaassiutitigut atornerlugaasartut sumiginnagaasartullu.

Aamma atuaruk NIISIP naalakkersuinikkut iliuuseqaqqusivoq

Tamannalu Naalagaaffiit Peqatigiit meeqqat pillugit isumaqatigiissutaannik unioqqutitsineruvoq, Dansk Folkeparti ersarissaavoq. Taakkulu isumaqarput ajornartorsiutit Nunatsinnit aaqqinniarlugit iliuuseqartoqanngitsoq.

- Namminersorlutik Oqartussat tamanna akisussaaffigigallartillugu aaqqiissuteqartoqarnavianngilaq. Taamaattumik danskit naalakkersuisui iliuuseqartariaqarput. Danmark naalagaaffiup innuttaanut pisussaaffeqarpoq, isumaqarpungalu ukiorpassuit taamaattuarnera kanngunartoq, uani kalaallit meerartai 5.000-it eqqugaapput, Dansk Folkepartimit Nunarput pillugu oqaaseqartartoq, Søren Espersen, taama oqarpoq.

Taamaammat Dansk Folkepartip kissaatigaa, isumaginninnermut tunngasut Danmarkip Nunatsinnit arsaarinnissutigissagai kalaallillu meerartaasa atugarisaat pitsanngorsarniarlugit suligasuartussanik aallartitsissasut.

Aamma atuaruk Søren Espersen: Isumaginninnermut suliassaqarfik Danmarkip tigugallartariaqarpaa

Kalaallit Nunaat, MIO naapertorlugu, Naalagaaffiit Peqatigiit meeqqat pillugit isumaqatigiissutaannik unioqqutitsigaluartoq, danskit naalakkersuisuisa Dansk Folkepartip piumasai malinnianngilai.

Tamanna isumaginninnermut nunamullu imminermut ministerip Karen Ellemannip uparuarpaa.

- Danskit naalakkersuisuisa Namminersorlutik Oqartussallu akornanni isumaginninnermut tunngasunut suleqatigiinneq Namminersorneq pillugu inatsisit sinaakkutaasa iluanni pivoq, Kalaallit Nunaatalu isumaginninnermut tunngasut akisussaaffigigai suleqatigiinnermut tunngaviulluni, Karen Ellemann oqarpoq.

Tamannalu amerlanerussuteqartunit, Dansk Folkeparti avaqqullugu, taperserneqarpoq.

Aamma atuaruk Martha Lund Olsen meeqqat pillugit nassuiaateqartussanngortoq

Illuatungaanik Danmark Namminersorlutillu Oqartussat suleqatigiinnerulersimapput, ilaatigut Danmarkimi isumaginninnermik aqutsisoqarfik kalaallit isumaginninnermut siunersortiinut ikiuisartoq.

- Danmarkimimi meeqqat inuusuttullu navianartorsiortutpineqartillugit misilittakkanik annertuunik tunngaveqarpugut. Tamakkulu ilisimasat Kalaallit Nunaat eqqarsaatigalugu aamma atorneqarsinnaalluarput. Taamaattumik danskit naalakkersuisui siusinnerusukkut maannalu Kalaallit Nunaanni oqartussanut ikiusinnaallutik nalunaartarsimapput, Karen Ellemann oqarpoq.

Isumaginninnermut Naalakkersuisoq, Martha Lund Olsen, danskit isumaginninnermut ministerianut nassuiaatigereerpaa kommunini meeqqat atugarisaat pitsanngorsarniarlugit suliniutit suut aallartinneqarsimanersut.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat