Foghip Trump nersualaaraa

Siunnersuisarfittut suliffeqarfiup MarketWatchip nittartagaani taama allaaserisaqarpoq. Fogh ilaatigut ima allappoq:

- Donald Trumpip Amerikami ukiuni aggersuni naalakkersuinikkut patajaallisitsisinnaallunilu amerikamiut nunarsuarmi tatiginartumik siuttooqqilernissaat angusinnaavaa.

Fogh ilaatigut isumaqarpoq Trump 'silarsuarmi pissutsinik allaanerusumik isiginnissasoq' aammalu iluareqqusaarneq - amerlaqisut Trumpimut ilisarnaatigititaat -  piviusumik politikkikkut ingerlatsinermi atorneqarsinnaassasoq.  

Trumpip USA-mi præsidentinngorsinnaanera Anders Foghip siorna apersorneqarnerminut atatillugu arlaleriarluni isornartorsiorpaa.

Trumpip Europamut tunngatillugu isummersuutigisai "navianartuunerarlugit" Trumpillu inunnik Assaditut, Saddam Husseinitut Kim Jong-unitullu ittunik pitsaasumik eqqartuisimanera ilaatigut aviisimi Berlingskemi isornartorsiorpaa.

Anders Fogh Rasmussen ullumikkut siunnersuisarfittut suliffeqarfimmik ingerlataqarpoq, ilaatigut nunani allani politikerinik siunnersuisartuulluni.

Donald Trump præsidentitut tallimanngorpat pisortatigoortumik ivertinneqassaaq.