Fogh: Trumpip Kalaallit Nunaat akuliuffigissanngilaa
Danskit ministeriunerisimasaat Natomilu generalsekretæriusimasoq Anders Fogh Rasmussen (V) USA-p præsidentianut Donald Trumpimut, Kalaallit Nunaata tiguarnissaanik soqutiginningaarnerminik ersersitsisimasumut, isornartorsiuivoq.
Trumpimmi allaat sakkutuut atorlugit tiguaasoqarsinnaanera itigartitsissutiginngilaa.
- Amerikamiut præsidentiata iligisaminik sioorasaarinera kanngusunnartoqartippara. Danmark USA-p iliginerpaasaasa tatiginarnerpaartaasalu ilagaat, Fogh tusagassiuutinut Politico-mut oqarpoq.
Marlunngornermi Copenhagen Democracy Summit-imi demokratii pillugu ataatsimeersuarnermut, Foghip aaqqissugaanut, atatillugu, tamanna pivoq.
Trumpip Kalaallit Nunaannut tunngatillugu iliuuserisimasai Fogh-ip arlaleriarluni isornartorsiortarpai. Ukioq manna siusinnerusukkut Trumpip præsidentiuleqqinnerata kingorna sammisaq taanna initoorujussuanngoqqippoq.
Nunap iluani nunanilu tamalaani isumannaatsuunissaq eqqarsaatigalugu Trumpip Kalaallit Nunaat soqutigalugu oqartarpoq.
Kalaallit Nunaat paariniarlugu iliuuseqarpiarsimanngitsut
Aalajangersagaq - illersornissaq pillugu isumaqatigiissut 1951-imeersoq naapertorlugu USA-p Kalaallit Nunaanni sakkutooqarfiliorsinnaatitaanera Foghip eqqaasitsissutigaa, USA-li nammineerluni qeqertami sakkutooqarfimminik annikillisaasimanerarpaa.
Kalaallit Nunaat Nato-mut illersornissakkut ataatsimooqatigiinnut ilaasoq ministeriunerusimasup aammattaaq oqaatigaa, taamaattumik Kalaallit Nunaata illersorneqarnera USA-p naammaginngikkuniuk, „USA peqatigalugu illersornissamut suleqatigiinnerup nukittorsarneqarnissaa tikilluaqqussavarput“.
Danmark Kalaallit Nunaat paariniarlugu iliuuseqarpallaarsimannginnera aammalu russit kineserillu umiarsuai assersuutigalugu issittumi angalasarnerat ajornanngippallaartoq, Trump ilaatigut isumaqarpoq.
Pissutsit Foghip ernumanarnerarpai. 2019-imi Trumpip Kalaallit Nunaannik soqutiginninnini siullerpaamik oqaatigaa.
Taamanikkut Kalaallit Nunaat pisiariumavaa. Maannakkut allaanerulluinnartumik oqariartuuteqarpoq qaammatinilu kingullerni Kalaallit Nunaat arlaleriarluni eqqartortarlugu, assersuutigalugu qaammammi matumani siusinnerusukkut NBC Newsimit apersorneqarnermini.
/ritzau/
