Fogh Rasmussen qinersinissamik nalunaaruteqanngilaq
Ministeriuneq Anders Fogh Rasmussen qinersinissamik ullumikkut nalunaaruteqanngilaq. Tamatumunnga taarsiullugu, Konservativit siulittaasuat Bendt Bendtsen peqatigalugu, siunnersuummik, akileraarutitigut oqilisaanissamik imaqaatigaluni atugarissaarnerulernissamut aningaasaliinerunissamik imalimmik, saqqummiussivoq.
aggustip 21-at 2007 15:12
Naalakkersuinermulli malinnaaqqissaartut qinersinermik nalunaaruteqarnissap ullorpassuarni kinguartinneqarsimanissaa ilimaginngilaat.
Malinnaasut akerlianik ilimagaat, partiit naalakkersuisuutitaqartut marluusut ullumi saqqummiussinerat qinersipallannissamut aallarniutaaginnartoq.
Socialdemokratit, aamma partiip naalakkersuisunik tapersersuisup, Dansk Folkepartip, akileraarutit pillugit siunnersuut naapertuilluanngitsutut nalilerpaat, aamma pisuut akileraarutinik oqilisaaviginiarneqarnerpaasut maluginiarsimavaat.
Akerlianik Radikale Venstret siunnersuummut isumaqataapput. Tassami partii isumaqarpoq 10 milliardit akileraarnikinnerulissutaasussat nukissiuuteqarnikkut akitsuutinit pissarsiarineqarumaartut.
