Fogh kamappoq

Amerikamiut qulit sorsunnermi tigusanik killisiuisartut nalunaarput Afghanistanimi tigusanik aaqqissuussamik naalliutsitsisoqartartoq, tamatumalu kinguneranik Danmarkimi illuatungiliuttut naalakkersuisunik isornartorsiuipput.

Isornartorsiuinerli ministeriunermit Anders Fogh Rasmussenimit akerlilerneqarpoq – aamma kamattorsuuvoq:

- Paasissutissanik taamaattunik saqqummiussisoqaraangat kamattorujussuusarpunga, tassami taamaaliornikkut nunat tamat akornanni iligiit, soorlu ilaatigut Irakimi ilaatigullu Afghanistanimi suliniarnerat tatiginarunnaarsinniarneqartarmat, Fogh Rasmussen oqarpoq.

Danskit sakkutuui tigusaminnik naalliutsitsisannginnerarlugit naalakkersuisut nalunaarutaat aamma aalajangiusimanerarpaa.

Tamatumunngali isumaqataanngillat Socialdemokratit, Det radikale Venstret, SF-it aamma Enhedslisten. Partit taakkua sisamaasut piumasaraat Folketingip siulittaasoqarfia misissuisitsissasoq.

- Naalakkersuisut tigusat qanoq pineqartarsimanerannik nammineerlutik annerusumik paasiniaasariaqaraluarput, Mogens Lykketoft Socialdemokratineersoq oqarpoq.

- Naalakkersuisut misissuinissaminnut pissutissaqarluarsimagaluarput. Tassami aviisini naapertuilluanngitsuliortoqartartoq allaaserineqartarpoq, Bush aamma Rumsfield oqarput nunat tamat akornanni isumaqatigiissutit malinneqarnianngitsut aamma tigusanik killisiuinerni danskip oqaluttaasup sakkutuunut qullersaminut oqaatigaa naalliutsitsisoqartartoq takusimallugu. Tamakkua tamarmik tusaanngitsuusaarneqarput oqartoqarlunilu tamakkua uppernarsaataanngitsut, Mogens Lykketoft oqarpoq.