Fogh: Kalaallit qimmitik akisussaaffigaat

Ministeriunerup Anders Fogh Rasmussenip nunatsinni qimminik qimuttunik paarsinerluttarneq akuerisinnaanngilaa.

- Taamaattorli Kalaallit Nunaanni Naalakkersuisut tamanna pillugu oqaloqatiginianngilakka, innersuussutigissavarali qimminik uumasunillu nakkutilliineq Namminersornerullutik Oqartussat maanna oqartussaaffigimmassuk, Dansk Folkepartip uumasut atugarissaarnissaat pillugu oqaaseqartartuanut Christian H. Hansenimut akissuteqarluni ministeriuneq taama allappoq.

- Namminersornerullutik Oqartussat pineqartumut tunngatillugu uumasunik naalliutsitsisarneq akuersaarsinnaanngilluinnaritsik nalunaarput, tusagassiuutinullu aamma oqarlutik qimuttunik paarsinerluttarneq unitsinniarlugu iliuuseqarniarlutik, Anders Fogh Rasmussen allappoq.

Ministeriunerup innersuussutigaattaaq, nunatsinni inatsisit atuuttut naapertorlugit uumasunik naalliutsitsineq inatsisinik unioqqutitsinerusoq.

- Qimminik uumasunillu nakkutilliineq Namminersornerullutik Oqartussanut tunniunneqareermat, kalaallit maani naalakkersuisuinut saaffiginnissutiginissaat pissutissaqarsorinngilara, Anders Fogh Rasmussen, dansk folkepartiimut akissuteqarluni allappoq.