Danmarkimi qimaasut meerartaasalu atugarliornerat Danmarkimi folketingi-mi tusagassiutinilu qaammatini makkunani sammineqangaatsiartarpoq. Qimaasut sivisuallaamik nunasivinnissamut tunngasuni aalajangiinissap tungaanut utaqqisinneqartarnerat, meerartaasalu atugarliortarnerat oqallisaasunut ilaavoq.
Qimaasut atugaat pitsanngorsarniarlugit ilassutissatut Folketingimi 37 mio.kr.-nik aningaasaliisoqaraluartoq Socialdemokratineersoq Karen Hækkerup narrutsassimaqisoq aviisimut Politikenimut ima oqarpoq, issuaaneq aallartippoq:
- Anders Fogh Rasmussen-ip qimaasut angerlarsimaffii Danmarkimiittut takusarnissaaninngarnit Kalaallit Nunaanni issittumi qimussertilluni silami anarnissaq ornigineruaa. Taama oqarpoq Socialdemokratineersoq Karen Hækkerup, nangillunilu:
- Igalaat saavisa naasulersornissaat arsaassutitaarnissarlu qimaasut meerartaasa pisariaqartinngilaat, aningaasanik amerlanernik suliniutinillu pitsaanernik meeqqat pisariaqartitsipput, Karen Hækkerup naggasiivoq.