Fogh Barrosolu Kalaallit Nunaaliassaput

maajip 24-at 2007 07:56

Inunnik nuimasunik imaluunniit malunnaatilinnik Kalaallit Nunaannut tikittoqarnissaa ullut tamarluinnangajaasa tusartarparput.

Silaannaap allanngoriartornerata kingunerisaasa qimerloornissaat siunertaralugu, politikkimillu soqutigisaqaqatigiinneq pillugu nunatsinni Naalakkersuisut eqqartueqatiginissaat eqqarsaatigalugu, Danmarkimi ministeriuneq, Anders Fogh Rasmussen aamma EU-mi ataatsimiititaliarsuup siulittaasua, José Manuel Barroso, ullumimiit qaammat ataaseq qaangiuppat tikissapput.

Tikeraarneq Ilulissani sapaammi juunip ulluisa 24-ianniit marlunngornermi juunip ulluisa 26-ata tungaanut pissaaq.

Anders Fogh Rasmussenip José Manuel Barroso-llu sermersuaq qanimut takusassavaat, silaannaq pillugu ilisimasaqarluartunit pingaaruteqarsinnaasunik naatsumik ilisimatinneqassapput Ilulissallu kangerluani angalaassallutik.

Nutaarsiassaqartitsivik Ritzau taama ilisimatitsivoq.