Naalagaaffeqatigiit isertortumik paasiniaasartui, CIA, Kalaallit Nunaat Savalimmiullu qulaallugit isertortumik timmisartuussisarsimanersut Danmarkimi ministeriunerup, Anders Fogh Rasmussenip, akissuteqarfigiumanngilaa.
Folketingimut ilaasortamut, Kuupik Kleistimut, IA-meersumut, allakkatigut akissuteqarluni, Kuupik Kleistip apeqqutaa Angallannermut Nukissiuuteqarnermullu Danmarkimi ministerimut, Flemming Hansenimut, ingerlateqqippaa.
Naalagaaffeqatigiit isertortunik ilumut parnaarussiveqartut, parnaarussanillu isertortumik angallassisoqartartoq, USA-mi præsidentip, George W. Buship, nassuerutigereerpaa.
Bush taama nassuereermat, Kalaallit Nunaat isertortumik ilumut qulaavaaneqartarsimanersoq Danmarkimi naalakkersuisut tamakkiisumik paasissutissiissutigisussaavaat.
CIA-p timmisartuutai Kalaallit Nunaat qulaallugu ilumut angalasarsimasut, timmisartullu katillugit aqqaneq-marluk Kalaallit Nunaannut akunnittarsimasut Kuupik Kleistip uppernarsaatissaqarnerarpaa.
Kalaallit Nunatsinnik qulaavaasarsimanernik inuit amerlanerit paasitinneqassanersut apeqqutaalerpoq, Angallannermullu Danmarkimi ministerip tamanna tassa akissuteqarfigisussanngorpaa.