Fodboldskolit aningaasaliiffigaat

Arsaattartut kattuffiat GBU aamma Nuna Fonden isumaqatigiissuteqarput ukiuni sisamani tullerni 200.000 koruuninik pissarsissutaasussamik.
Allattoq Noah Mølgaard
marsip 14-at 2011 13:13

Illoqarfinni 17-ni nunaqarfinnilu 30-ni fodboldskolet aasaru ingerlanneqassapput. Fodboldskolet nuannarineqartaqisut Nuna Fondenimit aningaasaliiffigineqarput ukiuni sisamani tulliuttuni ukiumut 50.000 koruuninik pissarsissutaasartussamik.

Fodboldskoleni peqataasartut tassaapput meeqqat inuusuttullu tallimat 15-illu akornanni ukiullit taakkulu sungiusarneqartarput unammineq tunullinngorallarlugu.

Nuna Fonden siusinnerusukkut fodboldskolenut tapiissuteqartartoq aalajangerpoq tapersersuinini nanginniarlugu, taama GBUp siulittaasua Lars Lundblad ilisimatitsivoq.

- Nuna Fondenip tapersersuinerminik sivitsuiniarnera imatut paasivarput GBUmi siulersuisut ukiuni kingullerni siunertaqarluartumik suliniarnerannik nersualaarininnertut, tassani pineqarmat pitsaasunik meeqqat inuusuttullu arsaannermi misigisaqartarnissaat, taama Lars Lundblad oqarpoq.