FN: Suiaassuseqatiminnik atoqateqartartut immikkoortinneqartassanngillat
Hollandimiut Franskillu isumaqatigiissusiaat amerlasuunit atsioqataaffigineqarmat, Hollandimiut nunanut allanut ministeriata, Maxime Verhagenip iluarisimaarpaa.
Naalagaaffiit Peqatigiinni aatsaat taama nunat amerlatigisut anguteqatiminnik arnaqatiminnillu atoqateqartarnermut tunngasumut oqallinnermut peqataapput.
Naalagaaffiit 60-it namminneq inatsisigeriikkamik ataqqineqarnissaat pillugit immikkut isumaqatigiissusiorput, meeqqanik kinguaassiuutitigut atornerluiniartartut siunissami akuerineqariartulernissaat ilaatigut annilaanngatigigamikku.
Suiaassuseqatiminnik atoqateqartarneq naalagaaffinni 80-ini inerteqqutaavoq ilaannilu allaat toqumik pillarneqaataasarluni. USA-p, naalaagaaffinniit killerniit kisiartaalluni isumaqatigiissusiat arlaannaalluunniit atsiunngilaa. Suiaassuseqatiminnik atoqateqartartut immikkoortillugit pinerluttutut malersorneqarsinnaassanngitsut USA-mi eqqartuussiviit qullersaata aalajangernikuugaluaraa, naalagaaffiit ilaanni sulisitsisut immikkoortitsisinnaasarput.
Angutit anguteqatiminnik atoqateqartartut Amerikamiut sakkutuuinut ilanngussinnaapput aatsaat anguteqatiminnik atoqateqartarnertik isertuukkunikku.
Naalagaaffiit muslimeqarfiusut suiaassuseqatiminnik atoqateqartarneq inerteqqutigerusuttuarpaat.
Hollandimiut Franskillu isumaqatigiissusiaannut atsioqataasut 66-it akornanni taamaallaat Asiami naalagaaffiit marluk Afrikamiillu sisamat atsioqataapput.