FN-mut naqqiisoqartariaqarsoraa
Nunanut allanut ministeri Per Stig Møller FN-mut paasissutissanik eqqortunik nassiussiniarnersoq Lars-Emil Johansen-ip apeqquteqaatigeqqinniarpaa.
Lars-Emil Johansenip taama piumasaqalernera pissuteqarpoq, nunanut allanut ministerip akissuteqarnermini eqqortuusorinngimmagu oqartoqarsimasoq kalaallit savalimmiormiullu danskisorluinnaq misigisimasut.
Per Stig Møllerip Lars-Emil Johansenimut qanittukkut akissuteqarnermini oqarpoq taamatut oqarsimaneq pisortat najoqqutassaani imaqarniliamiinngitsoq, tusagassiutitigulli nalunaarummi allassimasoq taannalu najoqqutarineqarsinnaanngitsoq. Per Stig Møllerip FN-mut oqaasiinnartigut eqqortumik paasissutissiisoqarsimasoq nalunaarutigisareerpaa.
Akissut naammaginagu Lars-Emil Johansenip piumasaraa eqqortoq FN-mut nalunaarutigisariaqartoq. Tassungalu tunngatillugu Demokraatineersoq Per Berthelsen oqarpoq FN-ni danskinit salloqittarneqarsimangitsoq. Per Berhelsen isumaqarpoq Danmark-ip Kalaallillu Nunaata akornanni isumaqatigiinniarsinnaaneq Lars-Emil Johansen-ip iliuuseriligaanik ajoquersorneqalersoq.
