FN: Israelip Libanonimik qaartartumeerinera unioqqutitsineruvoq

Libanonip illoqarfiisa pingaarnersaanni Beirutimi aseruisimanerit takoreerlugillu, Naalagaaffiit Peqatigiit FN-ip ikiuiniarnermut pisortaa, Jan Egeland, Norgemeersoq, oqarpoq tamanna inuit pisinnaatitaaffiinik unioqqutitsinerusoq.

Israelip ulluni kingullerni aqqaneq-marlunni Libanonimik qaartartumeerisimanerata kingunerisaanik illorpassuit aseruatitersimapput, Jan Egelandillu aseqqukorpassuit takoreerlugillu Israelip Libanonimik qaartartumeerisimanera inuit pisinnaatitaaffiinik unioqqutitsinertut nalilerpaa.

Beirutimi muslimit shiasiortut najugaqarfigisaanni Hisbollah allaffeqarfeqarsimagaluarpoq, massakkulli suujunnaarsinneqarsimallutik.

Israelip Hisbollah-llu akornanni parnaarussanik paarlaasseqatigiittoqarnissaannik isumaqatigiinniartoqarnera Hisbollah-mit ilassilluarneqarsimasoq, Libanonip parlamentiani siulittaasoq oqarpoq.

Sakkutuut Israelimeersut marluk Hisbollah-mit iperagaatinneqarnissaat isumaqatigiinniarnernut ilaapput.

Ullaap tungaanili Israelip qaartartumeerinera Hisbollah-mit akiniarneqarpoq, Israelip avannarpasinnerusortaaniittoq illoqarfik Haifa raketinik eqqorneqarsimammat.