FN-ip ulloq manna nunani tamalaani anartarfiit pillugit ullorititaaraa

Ullumikkut ullormik nunani tamalaani malunnartitsiniaqqulluta Naalagaaffiit Peqatigiit kajumissaarutigaat, ullormi manna novembarip 19-iat siunissami "nunani tamalaani anartarfiit ullorissagaat" aalajangiunneqarpoq.
novembarip 19-at 2013 08:03

Peqqissuunissamut ajornartorsiutip isiginngitsuusaarneqartartup isiginiarneqarnissaa anguniarlugu, ullumikkut ulloq Nalagaaffiit Peqatigiit malunnartinniarpaat.

Nunarsuatsinni inuit 2,5 milliardit peqqissuunissamut tunngasunik isumagineqarpianngillat - aamma nunarsuarmi inuit 1,1 milliardit taamaallaat silami perusuersarnissamut periarfissaqarput.

Nunarsuarmiut tamarmik anartarfeqaleraluarpata, meeqqat ukiut tamaasa 200.000-init amerlanerusut annaanneqarsinnaalissagaluartut, Naalagaaffinnit Peqatigiinnit oqaatigineqarpoq.

Ajornartorsiut maani Nunatsinni takornartaanngilaq. Illut tuusintilikkaat kuutsiinnarissamik anartarfeqanngimmata, siparninik anartarfeqartoqartarpoq.

Siparninik anartarfillit Nunatsinni qassiunersut paaserusullugu, Naatsorsueqqissaartarfik Radioaviisimit ippassaq aperaarput, tamakkuninngali kisitsisaateqartoqanngitsoq Naatsorsueqqissaartarfiup oqaatigaa.

Anartarfiit nunarsuaq tamakkerlugu ulloqartinneqalernissaat quiagineqassasoq quiassuaatigineqassasorlu, Naalagaaffiit Peqatigiit eqqoriarsinnaavaat.

- Illakuluutigineqarnissaa aamma ajunngilaq, tamanna nunarsuarmi peqqissutsimik anartarfeqarnermullu ajornartorsiutit pillugit pimoorussilluni oqallinnissamut ajoqutaassanngikkuni ajornavianngilaq, Naalagaaffit Peqatigiit Singaporemi aallartitaat, Mark Neo, nutaamik ulloqartitsisalernissamut siunnersuuteqartuusoq oqarpoq.