FN-ip aallartitaa Nuummiittoq

Inuit pisinnaatitaaffii pillugit Naalagaaffiit Peqatigiit aallartitaat Manfred Nowak ullumi Nuummut tikippoq, ilaatigut pineqaatissinneqarsimasunut inissiisarfik politiillu isertitsivii takuniassallugit.
Allattoq Elisa Isaksen
maajip 02-at 2008 14:43

Manfred Nowak Naalagaaffit Peqatigiit aallartitaattut nunarsuarmi tamarmi angalavoq, ilaatigut nunani assigiinngitsuni parnaarussivinni aamma tarnimikkut innarluuteqartut uninngavigisaanni naalliutsitsisoqartarnersoq misissortarlugit, tamakkualu naalagaaffinnut peqatigiinnut nalunaarusiarisarpai.

Naalagaaffiit Peqatigiit aallartitaata Manfred Nowakip politimesteri Steen S. Thomsen naalakkersuisullu ullumi ataatsimeeqatigissavai, suullu takorusunnerlugit nalunaarutigissallugu, Sermitsiap nittartagaani taamatut allaaserinittoqarpoq.

Manfred Nowak radioavisiimit oqaloqatiginiaraluaratsigu oqarpoq, Nuummi takusassani takoreerunigit aatsaat oqaaseqarsinnaalluni. Naalagaaffiit Peqatigiit sinnerlugit aallartitaq allanik sisamanik angalaqateqarluni Nuummiippoq, sapaatiuppallu aallaqqissalluni.