FN-imik saassussineq kamatsitsivoq

Naalagaaffiit Peqatigiit Libanonimi nakkutilliisuutitaat sisamat israelimiunit ippassaq toqutaapput.

Naalagaaffiit Peqatigiit qullersaat tupassimaqisoq Kofi Annan oqarpoq Israelimiut piaaralutik Naalagaaffiit Peqatigiit nakkutilliisoqarfinnik qaartartumeerisimasut. Qaartartumeerineq nunani arlallinnit sakkortuumik avoqqaarineqarpoq, toqutaasullu nunaanni minnerunngitsumik kamatsitseqaaq, ingammik Finlandimi.

Østrigimiu, canadamiu, kinamiu finlandimiulu Libanonimi nakkutilliiartortillutik israelimiut timmisartumiit Keramip tungaanut qaartartumeerisaqattaarmata toqutaapput. Nakkutilliisuutitat inimut qimaaffissiamut qimarngusimapput taamaakkaluartorli qaartartumeerinerit sakkortoruttormata toqutaapput. Nakkutilliisuutitat oqaaseqatartuat oqaluttuarpoq inuit qimarngukkaluartut israelimiut ippassaq 14-eriarlutik qimaaffissiap eqqaani qaartartumeerisaqqattaarsimasut.

Kinap nunat allat pillugit oqaaseqartartuutitaa Finlandimilu præsidenti oqarput qaartartumeerinerup suut tamaasa aaqqikkunnanngikkai israelimiullu sooq qaatartumeerisimanerlutik nassuiaanissaat piumasaat. Naalagaaffiit Peqatigiit qullersaat nammineq nalunaarpoq israelimiut siornatigut neriorsuisimasut FN-ip nakkutilliisoqarfiinik qaartartumeeriniaratik. Tamannalu tunngavigalugu piaaralutik qaartartumeerisimanissaat Kofi Annanip eqqoriarpaa. Israelimiulli nalunaaruteqarput hizbollah-kkut FN-imit illersorneqarsinnaanissartik neriuutigalugu nakkutilliisoqarfiit affarliini toqqorsimaartarmata taamatut piaarinatik qaartartumeerisimallutik.

Naalagaaffiit Peqatigiit nakkutilliisuutitai 1978-miilli Libanonimi nakkutilliisoqarfeqarput. Massakkut 2000-t missaanniittut nunani quligiluaneersut tassaniipput. Sapaatip akunneri marluk kingulliit ingerlanerini nakkutilluusuutitat arlallit ikilerneqartarput.