FN-imi nunap inoqqaavi ataatsimeersualerput
Naalagaaffiit Peqatigiit New Yorkimi qullersaqarfiata ullaamut tikilluaqqussavai nunat inoqqaavisa aallartitai tusintit sinnillit Nunat Inoqqaavi pillugit immikkut ataatsimiittartoqatigiit Permanent Forumip arfinilissaanik katersuuppat maajip 25-ata tungaanut ataatsimiinnissaani.
Permanent Forumi tassaavoq FN-p iluani suleqatigiiffik nunarsuarmi tamanit toqqakkanik 16-inik ilaasortalik. Affai arfineq-pingasut naalagaaffinnit toqqagaapput sinnerilu arfineq-pingasut nunat inoqqaavisa kattuffissuisa innersuussuteqarnerisigut toqqagaallutik.
Kalaallit Nuaanni ICC-ip præsidentia Aqqaluk Lynge Issittumi nunat inoqqaavi sinnerlugit ilaasortaavoq.
Ukioq manna ataatsimiinnissami qulequttat pingaarnersaraat "Nunat, Najugarisat Pisuussutillu". Ajoraluartumik nunat inoqqaavisa ilisarnaataannut ilaavoq, nunagisamik arsaagaasimaneq imaluunniit pisuussutinik piiaaneq peqqutigalugu, aatsitassarsiornikkut uuliasiornikkulluunniit, nunagisamit qimagutitaasimaneq.
-Nunamik annaasaqarnerup najugarisamiilluunniit qimagutitaanerup kingunerisarpaa - inuttut ataqqinassusiiagaaneq, kinaassuseerunneq - oqaatsinik kulturimillu annaasaqarneq kiisalu inuussutissarsiutaarunneq, Permanent Forumimi ilaasortaq Aqqaluk Lynge oqarpoq.
-Ataatsimiinnermi najuuttussat, FN-ip qullersai, FN-ip nunarsuaq tamakkerlugu suleqatigiiffissui naalagaaffiillu aallartitarpassuisa nunat inoqqaavisa inuttut tunngaviusumik pisinnaatitaaffiisa tullaarineqarnerannik oqaatigiumasaat nammineq siutiminnik tusarumaarpaat, Aqqaluk Lynge naggasiivoq.
Nunat inoqqaavisa kattuffissui nunarsuarmi tamarmeersut nalunaarsimapput ualimut Naalagaaffiit Peqatigiit New Yorkimi qullersaqarfiata saani ingerlaaqatigiinniarlutik piumasaralugu Nunat Inoqqaavisa Pisinnaatitaaffii Pillugit Nalunaarut FN-p generalforsamlinngianit akuerineqaqqullugu. Nalunaarut taanna FN-ip Inuit Pisinnaatitaaffii pillugit Siunnersuisoqaarfiata siornali akuersissutaa suli FN-imi naammassineqanngilaq Amerikamiut, Russit, Canadap Australiap New Zealandillu nalunaarutip akuerineqarnissaralua ajoqusersormassuk.
