FN Darfurimi sakkutuuliiniarpoq
Sudanip immikkoortortaani Darfurimi eqqissisimatitsisussanik sakkutuuliisoqassasoq, Naalagaaffiit Peqatigiit isumannaallisaaniaqatigiivini akerliunertaqanngitsumik aalajangerneqarpoq.
Darfuri pillugu aalajangersagaq akuersissutigineqaqqammersorli isornartorsiuisoqalerpoq.
Tassa aalajangersagaq Sudanimit Kinamiillu isornartorsiorneqangaatsiarpoq, kingornalu allanngortinneqarlunilu sakkukinnerulersinneqarami.
Kina Sudanimut sakkunik tuniniaasunit annerpaajuvoq, uuliamillu pisisartut annersaralugit.
Aalajangersagaq tunuliaqutaralugu Sudanimik pillaasoqarsinnaanngilaq, sakkussianillu arsaarinnittoqarsinnaanani.
FN-ip Sudanimi sakkutuuliiniarnera Danmarkimit tapersersorneqaraluartoq, Danmarkip sakkutuuliinissaa Venstremit Dansk Folkepartimiillu orniginartinneqanngilaq.
Sakkutuunik siunnersuisussanik Sudaniliartitsisoqassasoq siunnersuutigineqarpoq, Afrikamilu nunat peqatigiit sakkutuuliinissaat siunnersuutigineqarluni.
