FN: Canadami inuit nerisarluttorujussuupput

Canadap ministeriunera siuttuliullugu politiikererpassuit qassiiliorrattorpassuupput, canadamiummi inuussutissatigut inissisimanernannik Naalagaaffiit Peqatigiinnit immikkut misissuiartortitartik sinneqarmat, taassumalu ilumut canadamiut tamavimmik nerisarissaanersut misissugaralugu.
Allattoq Knud Reimer
maajip 19-at 2012 15:10

Naalagaaffiit Peqatigiit sinnerlugit misissuiartortitaq sinnerlugu Olivier De Shutter Canadap ministeriunerata ministereqataasalu isornartorsioreerpaat, nunanilu ineriartorfiusuni misissuiartornisaa imminut akilersinnaanerunerarlugu.

Canadali inerisarluarneqareersimaqisoq aatsaat taamatut misissugarineqalinngilaq.

Schutterimmi nalunaarusiaa malillugu naak Canada atugarissaarfiugaluaqisoq canadamiut tamarluinnarmik peqqinnartunik nerisaqarnissaminnut periarfissaqanngillat, tamatumalu saniatigut atugarissaartut atugarliortullu immikkoorutaat sualunneraqalugu.

Aamma atugassatigut Canadap avanaani kujataanilu assigiinngissusaat malugisinnaalluarnerarpai. Canadamullu tamavimmut atuuttussamik inuussutissatigut isumannaarininninnissamik Canadamiut naalakkersuisui suliniuteqarnissaat kissaatiginerarlugu.

Naggueqatitta inuit siuttuat Mary Simon Shutterimik ataatsimeeqateqareermat naggueqatigiit inuit 80 procentii nerisarluttuunerinik Shutterip isummersimanera Nunatsiaq Newsimut ilumoornerarlugu oqaatigereerpaa.

Aamma Shutterip indianerit atugarliornerujussuat tikkuarpaa nerisarlussuarnerallu nittarsaassimallugu, naak nuna Canada inerisarluarneqarsimasutut taagorneqarsinnaagaluatoq, inuussutissatigut isumannaallissaaneq amigaateqaqaaq, tassami nunap inooqqaavi nerisat erngullu tungaatigut immikkoortinneqarsimaqigamik Olivier De Schutter taama naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq