FN arriippallaarineqarpoq
FN-imi Naalagaaffiit peqatigiinni silaannaap kissakkiartornera pillugu isumaqatigiiniarnerit ima arriitsigipput allaat siumukartoqanngivilluni, Nairobimi Kenya-miittumi ataatsimeersuartoqareersorlu taama tutsiuttoqarpoq.
Pinngortitaq pillugu nunarsuaq tamakkerlugu suliniaqatigiiffik isumaqarpoq massakkut taamatut arriitsigisumik silaannaap kissatsikkiartornera sulissutiginiarneqartillugu CO2-p anianerata affaannanngortinneqarnissaa pillugu sulissutigisassanut siunertarineqartut affaai aatsaat 2050-mi tikinneqarsinnaasut.
- Ministerit Nairobimi ataatsimeersuarnermi peqataasut ataatsimeersuarnerup inernera pillugu tulluusimaarutissaqanngilluinnarput.
- Nunarsuup kissatsikkiartornera navianarsisumik 2 grade celsiusinik qaffasissusilimmik qaffariassanngippat aappaagu Indonesiami ataatsimeersuartoqaqqinnerani pimoorullugu allatut isummertoqartariaqalerpoq, Pinngortitaq pillugu nunarsuaq tamakkerlugu suliniaqatigiiffiup generalsekretæria Kim Carstensen oqarpoq.
Nunalli EU-mi ilaasortaasut silaannaq pillugu ataatsimeersuarnermi pitsanngoriaataasinnaasunik kissaataat piviusunngortinneqarpoq, taakku kissaatigaat, Nunat tamalaat silaannarmik mingutsitsinnginnissamik Kyotomi isumaqatigiissutaat iluameqqissaaq misissoqqissaarneqartariaqartoq, ilaatigut timmisartukkut angallannerup piliaanik CO2-p anianera pilersimasoq taakkunannga tikkuartorneqarpoq.
Nunalli ineriartortuniittut arlallit ataatsimeersuarnermi tamanna pillugu akerliusimaqaat, taakkunannga annilaanngatigineqarsimavoq CO2-p anianerata killilersimaarniarnera pissutaalluni nunat piitsut kalluarneqarsinnaanerat.
Soorlu nunat Kina-kkutut Indiakkutullu ittut annertuumik CO2-mik aniatitsiffiupput, silaannaallu kiatsikkiartornera pillugu allannguisoqassappat aningaasaqarnermikkut eqqugaanissartik assut annilaanngatigaat.
Danskit avatangiisit pillugit ministeriat Connie Hedegaard ataatsimeersuarnermi peqataasoq naammagisimaarinnippoq:
- Danmarkip EU-llu akornanni iluaqutaasussanik pissarsivugut, Connie Hedegaard oqarpoq, taannattaaq isumaqarpoq silaannaap allanngoriartornera pillugu suliniutaasut arriippallaamik ingerlasut.
