FN aarlerisaarivoq: Atomimik nukissiorfissuaq ajunaarnersuaqartitsisinnaavoq

Ukrainemi Zaporizjzjami Europami atomimik nukissiuutiliorfissuit annersaata eqqaani tallimanngormat qaartartumeerisoqarnera FN-mi atomimut tunngasumik pisortap aarlerinartorujussuartut nalilerpaa.
Ukrainemi atomimik nukissiuutiliorfissuup eqqaani qaartartumeerisoqarpoq. Assi © : State Emergency Services/Reuters
Allattoq Ritzau
aggustip 06-at 2022 18:59

Ukrainemi Zaporizjzjami atomimik nukiliorfiup ajunaarnersuarmik pilersitseratarsinnaanera ilippanaateqarluarsinnaasoq,

Naalagaaffiit Peqatigiinni atomimut tunngatillugu pisortaq Rafael Grossi taama ippassaq avammut oqarpoq.

Avammut nalunaarutit taamatut nipillit tutsiussulerput, ippassaq tallimanngornermi Europami nukissiorfissuit annerpaartaasa ilaat Ukrainemiittup eqqaata qaartartumeerneqarujussuarnerata kingorna.

- Europami atomimik nukiliorfissuit annersaata eqqaani ippassaq qaartartumeerisoqarnera assorujussuaq uannut ernumatitsilerpoq. Atomimik qaartartumeerisoqariaannaavoq, taamaattoqassappallu Ukraine tamarmi eqqaaniittullu allat piuneerullugit qaartinneqariaannaapput, taanna oqarpoq.

Tallimanngormammi qaartitsinerit Grossi naapertorlugu "aatsaat taamak aarlerinartigisumik qaartitsinerupput".

Imminnut pisuuteqattaapput

Nukissiorfissuup eqqaani qaartitsinermut tunngatillugu Ukraine Ruslandilu maanna imminnut pisuuteqattaapput.

Ukrainemiut præsidentiata Volodymyr Zelenskyjip nukissiuuteqarfissuup qaartartumeerneqarneranut Rusland pisuunerarpaa.

- Atominut nukissiuuteqarfissuarmut qaartitsinerit tamarmik pinerluttuliornerupput aammalu qunutitsilluni pinerlunnerullutik, Zelenskyj Reutersimi taama issuarneqarpoq.

Zaporizjzjami nukissiorfissuarmi ledningerujussuaq innallaagissamut sakkortuumut atasoq tallimanngormat qaartitsinermi eqqorneqarpoq. Nukissiorfissuarmilu tassani teknikerit reaktori qamikkasuarpaat.

Radioaktivinillu aniasoqarneranik suli nalunaartoqarsimanngilaq.

Ruslandimiut illersornissaqarfiata Ukrainemiut taama pisoqarneranut pisuutippaat, russimmi isumaqarput, radioaktivimik aniasoqannginnera pillugu Ukrainemiut iluanaartut.

Atominik nukissiuuteqarfiup eqqaaniittut saassussineq taama ittoq maanna ernumassutigingaalerpaat.

Nukissiuutiliorfissuup eqqaani qaartitsinermut tunngatillugu USA-p Rusland pisuutippaa, oqarlutik Ukrainemiut sakkutuuinut Ruslandimiut taamatut eqqornaveeqqusersortut. Nukissiuuteqarfissuaq russit sakkutuuinit marsimi tiguarneqarpoq, sulili Ukrainemiut teknikeriinit aqunneqarluni.