Naalagaaffiit Peqatigiiit silap pissusia pillugu ataatsimiititaliaa maanna iliuuseqaqqusivoq!
- Tamanna nunarsuarmiunut aalajangiisuulluinnarpoq. Nunarsuarmi siuttuusut tamatumani siuttuunissaat neriuutigaara, Københavnimi tusagassiortunik katersortitsinermi nalunaarusiap saqqummiunneqarneranut atatillugu, Naalagaaffiit Peqatigiit qullersaat taama oqarpoq.
Nalunaarusiami oqaatigineqartut naapertorlugit, Nunarsuaq siunissami kianneruleraluttuinnassaaq, Nunatta sermersua nunarsuarmilu sermeqarfiit aakkiartuinnassallutik, immat qaffakkiartuinnassallutik, kiarujussuartarneri panernersuillu akulikinnerulissallutik, aamma sialussuarujussuartarnerit qarsutsinerillu amerlanerulissallutik.
Tamakku saniatigut imeq minguitsoq amigaataalissaaq aamma naatinneqartartut qajuusiassat, majsit aamma qaqorteqqasut ineritissinnaasaat annikinnerulissallutik.
Silap pissusia pillugu 2015-imi decembarimi nunat tamalaat Parisimi isumaqatigiissuteqarnissaannut atatillugu nalunaarusiaq nunarsuarmi naalagaaffiit siuttuinit tunngavissatut atugassiaavoq.