Ritzau Nunanit allanit

Floridami anorersuarujussuarmat inuit ikinnerpaamik 12-it ajunaartut

Kiattup anorersuarujussua, Irmamik taaguuteqartoq, aseruatitererujussuareertorlu inuit katillugit 60-it inuunerinik annaasaqarfiuvoq, taakkunannga 17-it USA-mi ajunaarlutik.

Allattoq Ritzau

septembarip 13-at 2017 07:15

Nutserisoq Sara K. Jakobsen

Nutaarsiassaqartitsivik Ritzau taama allaaserisaqarpoq.

Anorersuarujussuup Floridami Keysimi illut sisamararterutaat suujunnaarsippai sumiiffimmilu tassani illut 65 procentii aseruatiterlugit.

Nunamilu immikkoortumi tassani inuit aqqaneq marluk ajunaarput, sulili amerlanerusinnaasut, Floridami upalungaarsimasuutitat oqaaseqartartuat Alberta Moscosop oqaatigaa.

Anorersuarujussuarnerani USA-mi ajunaartut taamaasillutik 17-iupput.

Anorersuarujussuaq Floridamut anngummat inuit 6 millioninit amerlanerusut naalagaaffimmi tassani angerlarsimaffimminnik qimaguteqquneqarput.

Angerlarsimaffiit suliffeqarfiillu 5 millioninit amerlanerusut innaallagiaaruttoorput amerlaqisullu angerlarsimaffeerupput.

Inuppassuillu marlunngornermi angerlaqqimmata takusartik tupaallaatigisimaqaat.

- Angerlarsimaffeeruppunga suliffeerullungalu. Suuteqanngilanga, 50-inik ukiulik Mercedes Lopez nutaarsiassaqartitsivimmut Reutersimut oqarpoq.