Flex-normut atulerput

novembarip 10-at 2005 05:18

Suliffeqarfiit Kalaallit Nunaanni immikkoortortaminnut sumiikkaluartunulluunniit oqarasuaatimik normuinik assigiissitserusuttut maanna taamaaliorsinnaanngorput. Tele-Postip atuutilersitaa nutaaq taaguuteqarpoq Flex-normu.

Suliffeqarfinnut assigisaannullu ullumikkut sianerniaraangatta, sianerfigisatta illoqarfigisaani normunut atuutsinneqartunut sianertarpugut.

Suliffeqarfiit amerliartuinnartut oqarasuaatinut nuutsitsivimmik qitiusumit ingerlannissaat maanna orniginerujartorpaat, tamannalu ilutigalugu suliffeqarfiit normumik ataatsimoorussaminnik peqarnissartik pisariaqartikkiartorlugu. Normumik sianerfiusinnaasumik ataatsimik suliffeqarfik peqarpat, suliffeqarfiup niuerneranut avammullu kiinnerneranut iluaqutaassaaq. Inuit sumiikkaluarunilluunniit normu taanna sianerfigisinnaassavaat.

Tele-Postip atuutilersitaa Flex-normumik taaguuteqarpoq, 70-imik aallartilluni kisitsillu 4 naggasiutaasarpoq, soorlu nalinginnaasumik aamma taamaattoq. Normut Kalaallit Nunaanni tamarmi atorneqarsinnaapput, illoqarfimmullu allamut nuukkaluaraanniluunniit allanngortittariaqarani.