Coronavirusit assigiinngitsut marluugunartut misissuinerit takutikkaat
Savalimmiuni nakorsaanerup coronavirusip Savalimmiuni tuniluunnerata ingerlarnganik misissuinermi paasivaa, coronavirusit assigiinngitsut marluusut.
Danmarkimi aviisit ilaat, Berlingske sapaammi taama allaaserisaqarpoq.
Coronavirusimik tunillanneqarsimasutut Savalimmiuni, 52.000-ngajannik inuliusumi, nalunaarsukkat 118-iusut ataasinngornermi nalunaarutigineqarpoq.
Savalimmiuni nakorsaanerup, Lars Fodgaard Møllerip misissuinermini paasisani uissuummissutigai, tunillanneqarsimasummi ilaat sivisuumik sakkortuunillu ersiuteqartartut, ilaali taamaattanngitsut paasimmagu.
Coronavirusit assigiinngitsut marluusut
Coronavirusit assigiinngitsut marluugunartut paasisimagitsik, taassuma Tórshavnimi tusagassiortunik ullualuit matuma siorna katersortitsinermi
ilisimatitsissutigaa.
Aappaa tuniluutilertortanngitsoq, aappaali tuniluutilertortartoq paasisimavaat.
- Tunillanneqarsimasutut paasineqaqqaartut aatsuuttanngitsumik tunillanneqarsimasut paasivarput. Allaat inuit kunissimasut akornanni tuniluussimanngitsoq paasivarput.
- Tuniluutilertortanngitsoq Danmarkimiit anngussimasoq tuniluutilertortartorlu Islandimiit anngussimasoq, taanna oqarpoq.
Statens Serum Institutip isummiussaagallartoq ilisarigaa
Paasisanili ilumoornersut ilisimatusarnikkut suli uppernarsarneqarsimanngitsut, nakorsaanerup nassuerutigaa.
Taassumali Danmarkimi Statens Serum Institut attavigimmagu isummiussarigallagaa ilisarisimanerarpaat.
Statens Serum Institutimi virusinik misissuiffimmi aqutsisup, Anders Fomsgaardip oqarnera naapertorlugu coronavirusit assigiinngitsut marluunerannik isummiussaagallartut misissuinerpanni tunngavilersorneqarput.
Tamanna Kinami marsip aallaqqaataata missaani misissuinerup aamma paasinarsisippaa.