Stig Rømer Wintherip pisortatut tunuarneranit nalunaaquttap akunneri arlalialunnguit qaangiutiinnartut Nunatsinni Takornariaqarnermi Inuussutissarsiornermilu Siunnersuisoqatigiinni siulersuisunut ilaasortaq maanna aamma tunuarpoq.
Taanna tassaavoq Flemming Nicolaisen, siulersuisuni 1999-imili ilaasortaasimasoq, siulittaasutut kingusinnerusukkullu ilaasortatatut.
Naalakkersuisut siulittaasuat, Hans Enoksen, aamma Naalakkersuisunut ilaasortaq, Siverth K. Heilmann, Flemming Nicolaisenip ullumi nalunaarfigai, Nunatsinni Takornariaqarnermi Inuussutissarsiornermilu Siunnersuisoqatigiit siulersuisuiniit tunuarluni.
- Tunuarnera Stig Rømer Wintherip tunuarneranut toqqaannartumik attuumassuteqanngilaq, Flemming Nicolaisen Radioavisimut oqarpoq, nangillunilu:
- Tunuarninnut pissutaavoq siulersuisut akornanni suleqatigiilluartoqanngimmat, siulersuisunilu siulittaasortaap siunissamut pilersaarutai isumaqatiginnginnakkit.
Siunissamut pilersaarutini sunarpiaq isumaqatiginnginnerlugu Flemming Nicolaisenip annertunerusumik oqaaseqarfigerunngilaa. Nunatsinni Takornariaqarnermi Inuussutissarsiornermilu Siunnersuisoqatigiinni siulersuisuni maanna siulittaasuuvoq Bjarne Eklund, taanna maajimi atorfinippoq.