Fleischerip Siumumi siunissaa ullumi aalajangerneqassaaq

Inatsisartunut ilaasortaq Siumumeersoq, Henrik Fleischer, aamma aalisarneq pillugu ataatsimiititaliami siulittaasuusoq, pillugu qanoq pisoqassanersoq Siumup ulluinnarni aqutsisui ullumi aalajangiissapput. Tusarfik Siumumut atuumassuteqartoq KNR-imut ullup qeqqata siorna taama paasissutissiivoq.

Tusarfiulli ulluinnarni aqutsisut ullumi qaqugukkorpiaq ataatsimiinnissaat oqaatigisinnaanngilaa.

Partiip siulittaasuata tullia, Karl Kristian Kruse, KNR-imut ullumi oqarpoq, periarfissanngorpat attaveqassalluni, oqaatiginaguli qaquguussanersoq.

Partiimi eqqissiviilliorneq aallartippoq, Henrik Fleischer aalisarneq pinianerlu pillugit naalakkersuisumut, parteeqatiminut Jens Immanuelsenimut tatiginnikkunnaarluni sapaatit akunneranni kingullermi nalunaarummik atsiormat.

Sermitsiaq.ag  sapaatiummat allappoq, Henrik Fleischer, Siumumit ilaasortaajunnaarsitaasoq.

Henrik Fleischerip ilaasortaanerluni ilaasortaannginnerluniluunniit ilisimanngilaa. Taanna isumaqarpoq, namminermi partiillu akornanni paatsooqatigiittoqasimassasoq. KNR-imut ippassaq tama oqarpoq.  

Siumulli siulittaasoqarfia oqaaseqarumanngilluinnarpoq. Karl Kristian Kruseip Henrik Fleischer suli ilaasortaanersoq oqaatiguumanngilaa.