Fleischer: Siumup immikkoortortaqarfii kiffaanngissuseqarput

Siumup siulittaasuata naalakkersuisunilu siulittaasup Hans Enoksenip siuttutut sulineranik Siumup immikkoortortaqarfiisa 72-it ammasumik isummerusunnginnerat kiffaanngissuseqarnermut takussutissaasoq Siumup siulittaasuata tullia Jens Lars Fleischer isumaqarpoq.

Sanngiinnerpaajuvoq - Daniel Thorleifsen, peerputit! Taama qulequtserlugu Siumup siulittaasuata tullia Jens Lars Fleischer tusagassiuutinut allagaqarpoq. Taama qisuariarneranut pissutaavoq Radioaviisip paasiniaaneranut Siumup immikkoortoqarfiinit akissuteqartoqanngingajavinnera pillugu  inuiaqatigiilerinermi ilisimatooq Ilisimatusarfimmilu immikkoortumi pisortaq Daniel Thorleifsen ippassaq ulloqeqqanut radioaviisimi oqarmat taama isummerumannginneq partiip qullersaanit aqunneqarnermut immaqa takussutissaasoq.

Immikkoortortaqarfiilli partiimi siulittaasuminnik ammasumik naliliiumannginnerat qulaaniit aqunnermut takussutissaanani kiffaanngissuseqannginnermut takussutissaasoq, siulittaasup tullia Jens Lars Fleischer isumaqarpoq.

- Immikkoortortaqarfivut kiffaanngissueqarput paasiniaaffigineqarunik akissuteqarnissaminnut imalunniit akissuteqannginnissaminnut. Qulaaninngaanniit aqutsisutut tusatsiagaannarnik tunngaveqartut paasiuminaatsittorujussuuakka, Jens Lars Fleischer opqarpoq.

Immikkoortortaqarfiit sisamaannaat akissuteqarnerat tupigusuutiginnginneraa Jens Lars Fleischer aperaarput:

- Immikkoortortavut naalakkersinnaanngilagut akeqqullugit.

Ammasumik isummertoqarumannginnera demokratiskimik ingerlatsiffiusumi uggornartuusoq Daniel Thorleifsen isumaqarpoq.

- Oqallinneq sunaluunniit ammasumik ingerlanneqaraangat pitsaanerusarpoq, demokratiiminngaanniillu isigalugu isummertoqarumannginnera uggornartuuvoq.

Jens Lars Fleischerili isumaqarpoq immikkoortortaqarfinnit 72-nit sisamaannaat akissuteqarnerat oqallikkumannginnermik pissuteqanngitsoq.

- Namminneq aalajangigassarivaat, tusagassiortunit uagutsinniilluunniit aqunneqaratik, Jens Lars Fleischer erseqqissaavoq.