Flatrate Tele Greenlandimi atuisartunit atorneqarsinnaanissaa ilimananngitsoq

Atuisartut qaammammut aalajangersimasumik akiliiginnarlutik qanorsuaq internettimik atuisinnaanerat, flatratemik taaneqartartoq Tele Greenlandip immap naqqatigut kaabililersuiniarnerata atuisartunut periarfissaanissaa ilimananngilaq, Telemi pisortaq Brian Buus Pedersen oqarpoq.

Siunissami internettimik atuisartut atuinerujussuusinnaalissapput akiligassatik qaffappallaanngikkaluarlugit. Qaammataasat atorlugit attaveqarniarneq immap naqqatigut kaabilikkut attaveqarnerup aningaasartuutinik allatut aaqqisuisinnaalernerput periarfississavaa. Taava attaveqarniarnerup iluani suut qanoq akeqalernissaat allanngortitertussaassavagut. Ullumikkut siunissamilu flatrate malillugu akiliisitsisarnerup assipajaavanik akiliisitsisarpugut. Maannakkut 2008-mi 2009-milu aningaasartuutissavut misissulerpavut, qaammammullu aalajangersimasumik akiliilluni qanorsuaq internetimik atuisinnaaneq maani atuisartunut neqeroorutigisinnaalissaneripput oqaatigissallugu suli siusippallaaqaaq. Soorluli oqareersunga; akiligassatit qaffarujussuanngikkaluarlugit internetimik atuinerujussuanngorsinnaalissaatit, tamannalu aamma neqeroorutitsialattut oqaatigineqarsinnaavoq. Imaappoq ullumi internetimik atuinerit quleriaatingortikkaluarukkuluunniit akiligassatit qaffalaaginnarpata tamanna neqeroorutitsialaavoq, immap naqqatigut kaabileqalernitta taamatut periarfississavaatigut, ullumimi qaammataasat atorlugit attaveqarniarneq killeqarpallaaqaaq, Tele Greenlandimi pisortaq Brian Buus Pedersen oqarpoq.

Pilersaarutit malillugit immap naqqatigut kaabili 2009-mi atorneqalissaaq.