Flatrate

Nuummi Qaqortumilu TELE-POST-ip atuisuinut, ullumi ulloq aallarnerfigalugu ajornarunnaassaaq, flatrate-mut nioqqutinik atuisinnaanissaq, internetternermi immikkut akiligassaqalernissaq eqqarsaatigisariaarulluni.
Allattoq Apollo Jeremiassen
marsip 01-at 2013 07:24

TELE-POST-ip tusagassiutinut nalunaarutaa malillugu, flateratemik atueriaaseq taanna nutaaq atuisunit nuannaarutigineqarluarpoq, tassa atuisut 300-it sinneqartut siumut inniminneereersimasut allallutik.

Flatrate-mik pisinermi atuuppoq, naapertuuttumik atuinermik taaneqartartoq, taannalu 100 GB-imik annertussuseqarpoq. Atuinermi 100 GB qaangerneqarpat, sukkassuseq appartinneqassaaq, atuisut allat sukkassutsimik naammaginartumik atuisinnaaqqullugit taamaassalluni.

Taamaakkaluartoq internetimut suli isersinnaasoqartuassaaq, nutaarsiassanik allagarsianillu atuartoqarsinnaassalluni, facebook-ertoqarsinnaalluni netbank-imullu alakkarterisoqarsinnaassalluni, taamaaliornermi akiligassaq annertunerulissanngitsoq TELE-POST allappoq.

Flaterate Nunatsinni misileraassutaanikuungilaq, taamaattumillu atuisunit tamanna qanoq atorneqarnersoq TELE-POST-imit misissuiffigineqassalluni.

Misissuinerup takutissavaa, maanna atugaalersup assiganik siunissami allanik atuisunut neqeroorutaasinaasunik pilersitsisinnaanissaq, TELE-POST tusagassiutinut allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq