Attaveerunneq: Fjernsyniluunniit saassutingajattarpara

Tuukkaq mittarfittaamut meqqaartussanngormat inuppassuit Nuup avataaniittut toqqannartumik malinnaapput. Imaluunniit KNR-ip aallakaatitsinerata pingaarnertaani attaveerunnissaata tungaanut malinnaapput.

KNR-ip Sisimiuni innuttaasut attaveeruttoqarnera qanoq eqqarsaateqarfigineraat paasiniaaffigaagut, innuttaasullu qularinninngillat: Pakatsinarpallaarpoq.

- Eqqissillunga pissangallunga utaqqisimavara, Tage D. Lennert oqarpoq.

Timmisartorsuaq miliivissoq pissanganarseruttortorlu KNR-ip aallakaatitsinera teknikkikkut ajutoorpoq.

Tamannalu Tage D. Lennertip kamaatigaa:

- Pissanganarnerpaarlu takkutilersoq tekniskimik ajornartorsiuteqaleramik, uuminartorujussuuvoq uangaalluni. Soorunami nalussanngilaat facebookimi tamakku takunnissimagunik suna uparuarneriga, Tage D. Lennert oqarpoq.

Tage D. Lennert Assi © : KNR / Brian Mølgaard

Taassumami pakatsinermini Facebookikkut saqqummiussinera maanna 40.000-t sinnerlugit takuneqarpoq.

- Novemberi naallugu KNR reklame taanna uteqattaarnikuugaat, taavalu piffissaq kingulleq atorlugu teknikkikkut ajutoorneq, isumaga malillugu tamakku ajutoornissaraluat eqqanaarniarlugu qanoq piareersartoqarsimasussaagaluarpoq, Tage D. Lennert oqarpoq.

Toqqaannartumik isiginnaarlugu piviusorpalaarnerussagaluartoq

Taannalu pakatsisuni kisimiinngilaq. Ânánguak’ Aronsen eqqissilluni malinnaavoq, attaveerummallu pakatsiisimalluni.

- Assorujussuaq pakatsillunga fjernsyniluunniit saassutigangajattarlugu nuannisaruttorlunga.

Taassuma nunatta taama angitigisumik angusaqarnera qilanaarilluinnarsimagaluarpaa. Naalli timmisartorsuup minnera videorpassuartigut takoreeraluarlugu tamanna assiginngilaa.

- Malinnaaffigerusunnerugaluarakku aallaqqaataaninngaanniit taanna pisoq ilaa, piviusorpalunnerusutut isigalugu, Ânánguak’ Aronsen oqarpoq.

Hans Mølgaard aamma Jørgen Lund Olsen aamma taama isumaqarput:

- Soorunami uggornarpoq, aamma annertoorsuunngikkaluamik malinnaalaarusunnaraluarami susoqarnersoq. Assut pakatsinarpoq, pakatsinarujussuaqaaq, Hans Mølgaard oqarpoq.

- Aallaqqaammulli malinnaagama nuuttaqattaarlugu pigakku, takorusullugumi minnissaa.

- Aallaqqaammulli tassa, ulloq qeqqalersorli ikippara isiginnaarniarlugu, kisianni tassa takunngitsoorpara, Jørgen Lund Olsen oqarpoq.

Hans Mølgaardip aallakaatitsinerup pissanganarnerpaaffiani attaveerunnera pakatsissutigingaatsiarpaa. Assi © : KNR / Brian Mølgaard

Attaviluttoqartoq

TV-mi pisortap, Mathias Davidsenip oqarnera naapertorlugu inuit amerlavallaartut ataatsikkut internettimik atuineranni attavimmi tigooraasup sakkukippallaarnera pissutigalugu attaveeruttoqarpoq.

- Inuppassuit filmiliorlutik aallartimmata atortutsigut takusinnaavarput attavik signali tigooqqagarput annikitsuararsuanngortoq, Mathias Davidsen oqarpoq.

Taassuma KNR-ip aallakaatitsinerup isumannaannissaanut 4,5 megabit atortariaqaraa nassuiaatigaa, timmisartulli milernerani sukkassuseq taanna 0,2 megabitimut apparpoq.

KNR allat assigalugit Tusassimit attaveqartarpoq. Tusassillu pisortaata tullersortaata pisut allakkatigut akissuteqarluni ajuusaarutigaa.

- KNR-ip timmisartorsuup minnerata nalaani attaveerunnera ajuusaarutigaara, soorunami tamanna nangitinnerujussuuvoq, Tusassimi pisortap tullersortaa KNR-imut oqarpoq.

Taassumalu inuppassuit ataatsimoorfigisaanni angisuuni amerlanertigut attaviluttoqartassasoq nassuiaatigaa, mobilikkummi attavimmut tigooraasoq aalajangersimasumik tigooraasinnaavoq.

Mathias Davidsenip Jonas Hasselriisillu siunissami taama pisoqaqqinnginnissaa pissutigalugu aaqqiissuteqartoqarnissaa kissaatigaat.

- Suli uagutsinnut atuutilinngitsunik periarfissarpassuaqarpoq, taakkulu neriuppunga ammarneqarsinnaassasut, Mathias Davidsen oqarpoq.

- Mobiilikkut attaveqaatinik aaqqiissuteqartoqarsinnaavoq, taamaattorli ineriartortitsineq aningaasaqarniarnikkut aammalu piffissamik atuissaaq. KNR-ilu niuernikkut taamaattumik soqutigisaqarpat soorunalimi periarfissarsiorsinnaavarput, Jonas Hasselriis oqarpoq.