Finn Lynge: Nersornaaserneqarneq eqeersaanermut suliniarfiussaaq
-Nersornaaserneqarluni tuppallernarpoq, nersornaaserneqarneralu atorluarsinnaassavara, aamma isumaqarpunga avatangiiseq pillugu politikkeqarnissaq pingaaruteqartoq, politikerittalu akornanni avatangiisit pillugit politikkeqalernissamut eqeersaanissamut suliniuteqarusuppunga politikerinullu paasititsiniaarusuppunga, nersornaaserneqartoq, Finn Lynge oqarpoq.
Earth Charterip nunarsuaq tamakkerlugu suliniaqatigiiffiup avatangiisit pillugit paasisitsiniutitut sanatissimasai, UNESCO aqqutigalugu, kalaalisuumut nutserneqarlutik naqitertinneqarsimasut, Pilersuiffimmi uninngasutigineqartut, atorneqalernissaat nersornaaserneqartup suliniutiginiarpaa.
Atuakkat paasisitsiniutit naqiterneqareerlutik uninngaannaarput, taakkualu atuarfinni paasisitsiniutitut atorneqalernissaat Finn Lyngep suliniutiginiarpaa.
Namminersorlutik Oqartussat Avatangiisimik Pinngortitamillu mianerinninneq pillugu nersornaasiuttagaa 10.000,00 koruuninik aningaasartaqarpoq.
Nersornaasiunneqartut immikkoortunut pingasunut imikkoortinneqarput, Finn Lyngemullu nersornaasiunneqartoq tassaavoq: Tamatsinnik pinngortitamik avatangiisimillu mianerinninnissatsinnik ilisimaarinnilersitsinermit nersorniut.
