Finn Lynge: Kalaallit Nunaat qaquguluunniit namminiilivissinnaanngilaq
Kalaallit Nunaat qaquguluunniit, Islanditut, Norgetut Danmarkitulluunniit namminiilivissinnaanngilaq, taamaaliornissamut inuit ikippallaaqaat. Inuit 50.000-it inuiaqatigiinnik nammineq naalagaaffeqalersinnaanngillat, Finn Lynge oqarpoq.
- Oqartoqarsinnaavoq uuliamik, aatsitassanillu nassaartortoqalerpat Arabiamiusuut pisuujutigilerutta sulisussat pisariaqartitavut, soorlu imartatsinnik nakkutilliisussat aningaasalerivinnillu nakkutilliisussat, avataaniit tikisillugit akiliinnartaarsinnaagivut. Kisianni 50.000-iinnaalluta atorfinnut pisariaqarluinnartunut, immikkut qaffasissumik ilinniagaqarsimasut suliarisassaannut kalaallit inissitsitersinnaanngilagut, inuiaqatigiit ikippallaarujussuarmata.
- Hans Enoksen oqarpat nammineq 65-nik ukioqaleruni Kalaallit Nunaat namminiilivissimassasoq, taava inuppassuit upperissavaat. Inuiaat paasinnittaasertik naapertorlugu uppererusutatik upperissavaat, naalakkersuinermilli suliaqartut nuimasut Kalaallit Nunaata namminiilivissinnaaneranik isumaqarnerat uanga tupaallaatigeqaara. Nipituumilli ersarissumillu oqatigerusuppara: Kalaallit Nunaat namminiilivissinnaanngilaq, Finn Lynge oqarpoq.
Finn Lyngep aamma erseqqissarpaa namminersulernissamut angissamaarluni, kisiannili namminersorneq namminiilivinnerlu assigiinngitsorujussuunerat naqissuserlugu.