Finn Lynge: Inatsit tamat oqartussaanerannut naapertuutinngilaq!

Inatsisissatut siunnersuummi Aatsitassanut Ikummatissanullu Pisortaqarfiup aatsitassarsiornissamut pilersaarutit tamaasa isumagisussaavai, matumani avatangiisinut tunngasut ilanngullugit. Taamaalilluni aatsitassarsiornissamut pilersaarutini avatangiisit pillugit nalilersuinerit tamarmik Aatsitassanut Ikummatissanullu Pisortaqarfimmut ingerlateqqinneqartassapput, tassanilu aatsitassarsiornissamut pilersaarutinut tamarmiusunut ilanngullugit nalilersorneqartassapput.

Tamanna ajornartorsiutinik pilersitsisassasoq Finn Lynge isumaqarpoq. Tassami Nunatsinni pinngortitami aatsitassasiorfinnik pilersitsisoqartussanngortillugu suliffeqarfissuit aamma avatangiisinik isumaginnittut akornanni akerleriittunik soqutigisaqartoqalertassammat.

- Aatsitassanut Ikummatissanullu Pisortaqarfimmi atorfillit kissaatigaat, Pinngortitaleriffimmi atorfillit imminut nalunaarusiortassasut, taamaalillutik ajornartorsiutit atorfillit akunnerminni aaqqeqqaarlugit qinikkanut ingerlateqqissinnaaniassammatigik, qinikkallu taamaalillutik akuersiinnartussanngorlugit. Tamanna tamat oqartussaaqataanerannut peqquserluttuliorneruvoq, Finn Lynge oqarpoq.

Taamaattumik Finn Lynge isumaqarpoq, avatangiisit pillugit nalilersuinerit Avatangiisinut Naalakkersuisoqarfimmit isumagineqartariaqartut. Taamaalilluni qinikkat naliliinernit assigiinngitsunit marluusunit paasissutissinneqarsinnaaniassammata. Qinikkat aamma taamaalillutik aalajangiiffigisassatik paasilluarsimanerullugit akisussaaffilimmik aalajangiisassagaluarput.

- Assersuutigalugu Avatangiisinut Naalakkersuisoqarfimmit oqartoqarpat, qillerinermi aalat aniatinneqartut kloritaqartut ulorianartuummata, tamannalu nerisareqatigiiaarnermut sunniuteqarnerluttussaammat, allami qillerinissaq innersuussutigalugu. Suliffissuaqarfiillu oqarpata tamanna asuli oqalunneruvoq, qilleriffiusinnaasut tamarmik kloritaqarput, una qilleriffigisarput allanit allaanerunngilaq, aamma una ingerlanniagarput suliffissarpassuarnik pilersitsiviusussaavoq.

Taama pisoqartillugu qinikkat ilungersunartumik akisussaaffimmik tunineqartarput. Qinikkat tamakkua paasiuminnaatsittarpaat, kisianni tamakkuninnga paasinnittussatut qinigaapput. Tassami tamakkuninnga suliaqartussanngorlugit qinigaraavut. Kisianni tamakkua itinerusumik paasiniarneq ajorpaat.

- Taavalu Aatsitassanut Ikummatissanullu Pisortaqarfimmi atorfilittat pikkorissorsuit oqaannartarput, kammalaatit-aa ajornartorsiutitaqassappat uagut tamanna aaqqissaqqaarparput, Finn Lynge oqarpoq.