Finn Lynge: Biologit tatigineqanngillat

Nunarput sinnerlugu Europarlamentimi ilaasortaasimasoq puisinniartarnerillu sorsuutiginnittuusimasoq Finn Lynge Atugagdliutini saqqummersuni oqillissaaraluni allappoq nunarput ukiuni makkunani ilisarnaatinik marluinnik nittarsaassisoq.

Tassa Nunatut namminersulersussatut siunnissineq kiisalu ilimatuussutsit nutaaliat pingaartumik uumassusilerinermi atukkatigut ilisarnaatit.

Ilisarnaatit pineqartut marluk ataatsimoortinneqarnerat imaannaanngitsuusoq Finn Lynge naliliivoq.

- Namminersornerulernerup tunngaviusumik politikkiani Pinngortitamik aqutsineq pisassiissutigisartakkallu eqqarsaatigalugit biologit inassutigisartagaasa eqquutsittarnissaat isumaqatigiisutaasoq Finn Lyngep erseqqissaatigaa.

- Taama politikkeqarneq nunatta nunarsuarmioqatigiinnit ataqqineqarneranut peqqutaaqataavoq. Tamattalu nalunngisatsitut Hans Enoksenip namminersornersuata tamanna allanngortippaa, sulili Enoksenip partiimi siuttutut uppernarsaanera amigaatigaarput, tassalu Siumup maanna politikkia; pinngortitaq pillugu ilisimatuussuseq nutaaliaq tatigineqassanngitsoq kiisalu aallaaniartartut piniartullu ilimasaqarnerusut, Finn Lynge ilaatigut AG-mi taama allaaserinnippoq.

Pisassiisarnermi piniartut biologit inassutaannit sooq tusaaniarneqarnerusarnerat Hans Enoksenip nassuiaateqarfigisariaqaleraa Finn Lynge piumasaqarpoq.