Finn Lynge 75-liivoq
Inuuissiortup Finn Lyngep nunatta oqaluttuarisaanerani nutaajunerusumi akuulluinnarnera miserratissaanngilaq. Qasusuilluni inuiaqatigiit kalaallit sullippai, assigiinngitsunillu atorfeqarluni. Kalaallit Nunaata Radioani pisortartatut 1974-imiit 1979-ip tungaanut sulivoq. Nangaassuteqarani isummani annittarpai, inuiaqatigiinnullu pingaaruteqartunut tunngatillugu apeqqusiisarluni.
Inuiaqatigiit kalaallit pillugit Kalaallit Nunaata Radioa atanersoq imaluunniit Namminersornerullutik Oqartussat pillugit atanersoq apeqquserpaa.
- Ila immaqaana kalaallini inuiaqatigiit suna peqqutigisimagaluarnerlugu demokratimut tunngatillugu apeqqut taamaattoq nunani avannarlerni allani inuiaqatigiinnit allaasumik isigisimagaat, Finn Lynge, Peter Frederik Rosingip Marianne Stenbækillu Kalaallit Nunaata Radioa pillugu atuakkiaanni ”Radiormiut”-mi allappoq.
75-iliisoq pillugu taasinnaasaraluavut matumani inissaqartinngisavut amerlaqaat, Finn Lyngelli nunatsinnut tunniussarisimasai innersuussutigiinnassavavut.
