Finn Karlsenip ukiortaami oqaaseqaataa

Nuuk 31.12.2006

Asasavut nunaqqativut.

Ukiumi qaangiutilersumi, naalakkersuinikkut sulinitsinni annertuumik pisoqarfiusimaqisumi aammalu inuiaqatigiittut pissutsinut nutaanut annikinngitsumik ikaarsaarnissamut piareersarfiusimasumi innuttaasut eqeersimaarlusi peqataarusussuseqarlusilu suleqataanersi pillugu ATASSUT-mit qamannga pisumik qutsavigigerusuppassi.

ATASSUT-mimmi iluarisimaakkatsinnik nunatta ineriartortinneqarnera, taamaalillunilu kinguaassatsinnut ingerlateqqitassatta patajaallisarneqarnera, nunatsinni innutaasuususi annikinngitsumik sunniuteqaqataaffigaarsi. Tamanna naalakkersuinermik sulinitsinnut nukittorsaataallunilu suli annerusumik angusaqarnissaq siunertaralugu sulerusussuseqarnermik pilersitseqataavoq.

Ukioq qaangiutilersoq 2006 naalakkersuinikkut pisoqarfiusimaqaaq, namminersornerullunilu oqartussaanerup oqaluttuarisaanerani partiit pingasut, nalinginnaasumik illuatungeriittartut, akisussaaqatigiinneq suleqatigiinnerlu tunngavigalugit inuiaqatigiinnik kiffartuussinerput ATASSUT-mit naliliinerput naapertorlugu kusanartumik naammassivarput.

Soorunami partiitut ataasiakkaatut immikkut soqutigisavut anguniarlugillu sulissutigisaratsigit suleqatigiinneq ilaatigut annikigisassaanngitsumik qanngulussinnaasarpoq, allaallu partiitut ataasiakkaatut aammalumi ataatsimoorluni nalilersuisoqartariaqalertarluni suleqatigiinneq inuiaqatigiinnut pitsaanerpaajunersoq.

Naalakkersuinikkut suleqatigiilluta ingerlatsinitsinni killiffipput pitsaasuusoq inuiaqatigiinnullu toqqissisimanartuusoq ATASSUT-mit nalilerparput, taamaammallu naqissusissavarput aalajangiusimagatsigu suleqatigiinneq taanna iluatsilluaqqullugu nukivut tamaasa atorlugit akisussaassusilimmik aammalu ataqqeqatigiinnermik aallaavilimmik nangittumik sulinissagatta.

Tamannali isumaqanngilaq politikkikkut pingaartitavut tunuinnarlugit ingerlassasugut, ATASSUT-mi pissusitoqalerisuunngilavut kiffaanngissutsilli aqqani nutaaliornissaq pingaartillugu sulivugut, taamaammat naatsorsuutigineqarsinnaavoq partiitut pingaartitavut nangittumik sulissutigissagivut.

Innuttaasut toqqissisimallutik, isumaginninnikkut peqqinnissakkut ilinniartitaanikkullu atugarissaartuunissaasa qulakkeersimajuarnissaat ATASSUT-mit pingaartilluinnarlugu sulinerput nangissavarput, tamanna qularutigineqassanngilaq.

ATASSUT-mit ukiuni arlalissuarni Inatsisartuni sulinitsinni ilungersuutigalugu anguniartuarparput utoqqartatta sutigut tamatigut toqqissisimallutik inuusinnaanissaat, utoqqartattalu ukiup nutaap qiteqqunnerani aallartittumik aningaasatigut pitsaanerungaartumik atugassaqartitaalernissaat naammagisimaaqisatsinnik piviusunngortussanngorpoq.

Tamannali naammanngilaq, utoqqartatta ukiorpassuarni nukippassuit atorlugit inuiaqatigiinnut sullissereernikuullutik ukiuni qasuersaarfissaminni aningaasatiguinnaanngitsoq aammali inuttut atugarisatigut pitsaanerpaamik atugassaqartititaanissaat ATASSUT-mit pingaartilluinnarparput, taamaammat utoqqartavut namminneq angerlarsimaffimminniittut, utoqqaat pisinnaanerusut angerlarsimaffiiniittut aammalu utoqqaat angerlarsimaffiiniittut toqqissillutik inuuneqarnissaat qulakkeerniarlugu sulinerput nangissavarput.

Qujanartumik nunatsinni meeqqat amerlanersaat toqqissillutik angajoqqaaminnit paarineqarluarlutik aammalu maligassiorneqarluarlutik inuupput, ajuusaarnartumilli aamma angajoqqaaqarpoq inuuniarnikkut artorsaateqarnermikkut qitornaminnik naammaginartumik atugassaqartitsinngitsunik allaallu perorsaanissaminnut nukissaqanngitsunik.

Ajoraluartumillu taakkununnga pisortat sullissiniarnerminni amerlasuutigut meeqqat eqqugaasut annertuumik innarlerneqareersut aatsaat iliuuseqarsinnaasarput, ilaatigut angajoqqaat ajornartorsiuteqaleraluarlutik ikiorserneqarnissamillu pisariaqartitsigaluarlutik saaffiginninneq ajornerat pissutaalluni. Taamaammat ATASSUT-mit atuarfeqarfinnut aammalu inuusuttuaqqat ornittagaanut kaammattuutigissavarput ilaqutariinnermi pisinnaatitaaffiit pisussaaffiillu pillugit inuusuttuaraanermiilli qaammaasaqarlualernissaq pillugu isumannaarinninniarnermi angajoqqaanut tapertaalluaqqullugit.

Inuiaqatigiit toqqissisimasut aammalu ilinniarluarsimasut toqqammavigalugit ingerlagutta nunatta ineriartortinneqarnissaa aammalu kusanarnerpaamik kinguaassatsinnut ingerlateqqitassanngortinneqarnissaa isumannaarsinnaavarput, taamaammat ATASSUT-mit inuusuttunut kaammattuutigissavarput ilinniarnissamik kaammattuutit aammalu periarfissat akorluaqqullugit atorluaqqullugillu.

Ukiummi inuussutissarsiutitigut aammalu aaqqissuussaanikkut nutaaliaasut maanna alloriarfigisavut iluatsilluartumik angusaqarfigissagutsigit immitsinnut piumaffiginninnerput annertusartuartariaqarparput, katataasutut misigisimanata peqataasutulli misigisimalluta nunarsuarmioqataanitsinni unammisassavut nukissaqarfigilluassavagut.

Nunatta pisuussutaanik uumassusilinnik uumaatsunillu aningaasarsiornikkut iluaquteqarnissamik isumalluarneq ukiuni kingullerni annertusiartuinnarpoq, tamannalumi pissutissaqarluarpoq, tassami iluanaarluta inuuvugut nunami sutigut tamatigut atorluarsinnaasatsinnik pisuussutilissuarmi, isumalluaannaratali isumatusaartariaqarpugut aamma.

Pisuussutimmi qanoq iluaqutiginerpaasinnaanerlutigit uungaaraannaanngitsoq kisiannili siunissaq ungasinnerusoq ilanngullugu pilersaarusiorsinnaasariaqarpugut, assersuutigiinnarlugu pisuussutit uumassusillit piujuaannartitsinissap aqqani atorluartariaqarpavut.

Taamaaliussaguttalu taakku pillugit ilisimanninnerput annertunerpaaffimminiittariaqarpoq, taamaammat ATASSUT-mit pingaartilluinnarparput pisassiisoqarnissaanik aalajangiiniarnerni toqqammavissiuusseqataasartut, tassalu aalisartortatta piniartortattalu ilisimasaat aammalu pinngortitalerinermik suliaqartut ilisimasaat imminnut naapertuuttuunissaat, taamaattoqarpammi isumatuumik siunissamullu sapinngisamik annerpaamik isumannaarinnissinnaassuseqartumik aalajangersaasoqartarnissaa qulakkeersimaneqassaaq.

Taamatuttaaq pisuussutit uumassusillit pillugit ilisimasat annertusarneqarnissaannut nukissat aningaasassallu naammattut pigineqarnissaat ATASSUT-mit pingaartillugu nangittumik sulissutigissavarput.

Pisuussutit uumaatsut inuussutissarsiutigineqarnissaannut ukiuni kingullerni annertuumik ineriartortitsisoqarpoq, tupigusuutigisassaanngitsumillu nunatta pisuussutai uumaatsut avatitsinnit annertuumik soqutigineqarput, soqutiginninnerlu timitalimmik nunatsinnut annerpaamik iluaqutaasussanngorlugu eqeersimaartumik aalajangersimasumillu pissuseqarluta ilusilersorutsigu suliffissatigut aningaasarsiornikkullu iluaqutigissagipput qularutissaanngilaq, taamaammat namminersorneq pillugu nunatta Danmarkillu ataatsimiititaliarsuanni aatsitassarsiornerup siunissami qanoq inissinneqarumaarnersoq pillugu innersuussuteqartoqarnissaanut ATASSUT-mit pissangalluta naalaarpugut.

ATASSUT-mit maluginiarparput nunatta namminersulernissaanik allaallumi avissaarnissaanik kissaateqartut utaqqisinnaassuseqanngitsutullu pissuseqartut arlallit isumalluutigigaat pisuussutit uumaatsut isertitsissutaanissaat tunngavigalugu nunarput namminersulersinneqassasoq. Tamannali sinnattuaqinerusoq piviusorsiornerunngitsorlu ATASSUT-mit naliliivugut. Tassami nunatta namminersulernissaanut aningaasat kisiisa uuttuutigalugit aqqutissiuussisoqarsinnaanngitsoq ATASSUT-mit isumaqarpugut.

Namminersulernissamut tunngatillugu nalilersugassatsinni pingaarnerpaat ilagaat naalagaaffeqatigiinnerup ukiuni untritilinni arlalinni ineriartortinneqarsimanera qanoq siunissaqartikkusunneripput, uagullu ATASSUT-mit isumaqarpugut nunarput namminersulertikkaluarutsiguluunniit attaveqaqatigiinneq pitsaasoq tamatsinnullu toqqissisimanartoq ineriffilimmillu tunngavilik attatiinnassallugu sutigut tamatigut pissutissaqartugut.

Ukioq manna ukiunilu tulliuttuni naalakkersuinikkut suliassat pingaaruteqarluinnartut innuttaasunullu tamanut kalluaasussat aqqusaartortussaavagut: Kommunit aaqqissuuteqqinneqarnerat pillugu sulineq nanginneqassaaq, namminersulernissaq pillugu ataatsimiititaliarsuup inassutigisassai Kalaallit Nunatsinni Danmarkimilu Inatsisartunit Naalakkersuisunillu peqqissaartumik suliarineqartussat takkutissapput, imarmi nunamilu inuussutissarsiutit nutarterneqarnerat nalimmassarneqarnerallu nangittumik suliarineqassaaq, ilinniarsimassutsikkut killiffipput nangittumik qaffassarneqassaaq, eqqartuussiveqarneq pillugu ataatsimiititaliarsuup suliai inassutaalu tunngavigalugit suliat ingerlareersut suliassallu nutaat takkutissapput.

Tamakkuupput ukiuni tulliuttuni suliassarpassuit ilaat, qularutigineqassanngilarlu akisussaassusilimmik aammalu siunissamut qaninnermut ungasinnermullu isiginnilluta ATASSUT sinnerlugu Inatsisartuni Kommunini aammalu Nunaqarfinni aqutsisuni qinigaasugut sulinerput nangissagipput.

Nunatsinni innuttaasut tamassi pereersunut qutsavigalusi sulinerullu ingerlaqqinnissaanut peqatiseralusi ukiortaami qamannga pisumik pilluaqquassi, kissaappassilu peqqillusi iluanaarlusilu ukiup nutaap ullui tamaasa atorluarumaarisi.

Inussiarnersumik inuulluaqqusillunga

ATASSUT sinnerlugu

Finn Karlsen

Siulittaasoq