Finn Karlsenip Halibut Greenland tapersersorpaa
KNR-imi ippassaq oqaluttuaraarput Halibut Greenland, aningaasaliisunit arlalinnit pilersinneqarnikoq, ilaatigut aalisartunit, Upernaviup nunaqarfiani Aappilattumi maanna tunisassiorfimmik ammaarusulersoq.
- Isuma assorujussuaq tapersersornarpoq. Tassa soorlu oqartartugut tunitsivik suliffissuarlu assigiinngillat. Tunitsivik tunitsiviinnaavoq qeritiinnariarlugit avammut anissuisoq. Taavalu suliffissuaq, fabrikki, taanna allaavoq. Tassa aalisartut tunisissapput, taavalu taassuma iluani suliarineqassapput suliffissaqartitsillunilu iluaqutaanerusumik sunniuteqassaaq. Taamaammat tassa una siulleq maannakkut Halibut Greenland maannakkut ingerlasoq, tassa naalakkersuisuunerma nalaani aamma imaannaanngitsumik suliaq akerlilersorneqaraluaqalunga piviusunngortinnikuuara. Aamma massakkut soorunami taamatut ingerlaniarnera tapersersorpara, Finn Karlsen, aalisarnermut, piniarnermut nunalerinermullu naalakkersuisoq oqarpoq.
Halibut Greenlandip tunisassiorfiliornissaminut akuerineqassaguni, Ilulissani piginneqatigiiffittut ilusertik Upernaviup eqqaani tunisassiorfiliornissamut atorusuppaat:
- Nammineq soorlu oqareersunga tapersersorluinnarpara taamatut pisoqarnissaa. Aamma aalisartut aningaasarsiorluarnerunissaanik kinguneqartussaammat, soorlu Ilulissani taamaappoq. Taamaammat unammilleq peqqinnartumik ingerlanneqarnissaa assorujussuaq kissaatiginarpoq. Tassa oqareernittut uanga tapersersortorujussuuara taamatut pisoqarnissaa, Finn Karlsen oqarpoq.
