Finn Karlsenip Aleqa Hammond illuatungilerpaa

Aalisarnermut, Piniarnermut Nunalerinermullu naalakkersuisunngortussaq Finn Karlsen, Siumumeersoq, taama oqarpoq.

- Ingerlaannartumik pilersinnissaa uanga isumaga malillugu ulorianartoqarpoq, Finn Karlsen oqarpoq.

Aalisarnermut inatsisissatut nutaassatut siunersuutip tusarniutigineqarnera ippassigami naammassivoq, tassungalu atatillugu isornartorsiuisut arlaqarput. Ilaatigut GA IA-lu oqarput, tunisassiortut aalisariutinik piginnittuusinnaassanngippata, taakkua piginnittuujunnaarnerannut atatillugu taarsiissuteqarfigineqartariqartut, tamannalu akisussasoq.

Tassami fabrikkinik tunisassiorfinnik matooraasoqartariaqalersinnaammat amerlanerusut suliffissaaleqilernerrannik kinguneqartumik.

Tassalu taama naliliineq aalisarnermut naalakkersuisunngortussatut Naalakkersuisut siulittaasuannit suaarutigineqareersup isumaqatigaa.

Tamatumunnga pissutsit assigiinngitsut tunngavilersuutigai:

- Assersuutigisinnaavara kujataani fabrikkit maannakkut iluarineqaqalutik ingerlanneqartut. Piginnittumininngaannit amerlanerpaatigut nammineq pilersorneqarput. Taava taanna unitsinneqassappat pilersuisinnaaneq amigalissaaq. Taava suliffissat aamma ajornarsissapput, Finn Karlsen oqarpoq imatullu ima nangilluni:

- Avannarpasinnerusoq eqqarsaatigalugu selskabit piginnittuupput, piginnittuittut nammineq pigalugit tuniniarsinnaallugit, imaaliallaannaq arsaarneqarsinnaanatik. Selskabit fabrikkiutillit nammineq taakkua taamatut ingerlatsipput maannakkut. Arsaarutsigit, taava aningaasanik pilliuteqassaagut, ingerlaannaq atuutilersumik inatsisiliussagutta. Uanga isumaqarpunga taamaaliornissamut akissaqanngitsugut, Finn Karlsen oqarpoq.

Aalisarnermut, Piniarnermut Nunalerinermullu Naalakkersuisunngortussaq Finn Karlsen taama oqariarluni nalakkersuisut tunngaviusumik isumaat aamma isumaqatigalugu naqissuserpaa,

- Siunertaq taanna uanga tunngaviatigut ajorinngilara, kisianni ingerlaannaq atuutilissappat aporfissarpassuaqarsinnaavoq, Aalisarnermut, Piniarnermut Nunalerinermullu naalakkersuisunngortussaq, Finn Karlsen, Siumumeersoq, oqarpoq.

Inatsisartut januaarip ulluisa 27-anni immikkut ataatsimiitinneqarneranni Finn Karlsen Naalakkersuisutut pisortatigoortumik akuerineqassaaq, naalakkersuisutullu kingorna ivertinneqarumaarluni.