Finn Karlsen utoqqatserpa utoqqatsinngilaluunniit

Aalisarnermut Piniarnermullu Naalakkersuisoq Finn Karlsen, naalakkersuisoqatiminut, Great Greenlandimi siulersuisunut sulisunut atorfilittanullu ammerivimmik misissuinermik suliaqarsimasunut ullaaq utoqqatsertoq, Naalakkersuisut siulittaasuat Hans Enoksen, naalakkersuisut ullaap tungaani ataatsimiinngitsiarneranni oqarpoq. Taamattorli aalisarnermut pinianermullu naalakkersuisup utoqqatsersimanera, naalakkersuisooqataasut Inuit Ataqatigiit, naalakkersuisut ataatsimiinnissaat sioqqullugu tusarsimanngikkaat IA-p siulittaasua Josef Motzfeldt oqarpoq. Siullermilli Naalakkersuisut siulittaasuat Hans Enoksen naalakkersuisut ataatsimiittarfiata silataani ullaaq ima oqarpoq:

-Tassa naammassereerpoq, oqaloqatigiinnerit pitsaasumik naammassipput paaseqatigiippugut. Ammerivimmut tunngasut suliat tamarmik naammassipput eqqartorneqaqqissanngillat. Taava suliassat pingaarnerususnut nuunneqassapput.

Finn Karlsen ippassaq oqarpoq ajuusaarpunga oqanngilaq utoqqatserpunga. Hans Enoksen:

- Tassa utaqqatsissut pillugu ullaaq manna ataatsimeeqatigiippugut, taanna naammassivarput, taavalu tassa uterfigeqqinnianngilarput, sulineq siunissamut isigisumut aallarteqqinneqassaaq.

Great Greenlandimi siulersuisunut sulisunut naalkkersuisooqatigiinnut atorfilittaanullu Finn Karlsenip utoqqatsernera ingerlateqqissagini Enoksen erseqqissaavoq. Finn Karlsenillu Aalisarnermut Piniarnermullu naalakkersuisutut ingerlaannarnissaa naatsorsuutigilluinnarnerarpaa.

Naalakkersuisut siulittaasuat Hans Enoksen taama oqarpoq. Ataatsimiittarfimmut iseriartortoq IA-p siulittaasua aningaasaqarnermullu naalakkersuisoq Josef Motzfeldt aperaarput, Finn Karlsenip utoqqatsersimanera naammagineraat, imali akivoq:

-Takkuuk, aatsaat tusarpara, kisianni Naalakkersuisut maannakkut ataatsimiinneranni qularnanngilaq tamakkua ilisimatitsissutit saqqummiunneqassaqqaarput.

Utoqqatsernermik nalunaaruteqarneq suleqatigiinnermut sunniuteqarnersoq aperigatsinni Josef Motzfeldt akivoq:

-Takulaariartigu qanoq annertutigisumik, sukumiitigisumik utoqqatsissutitut oqaatigisarsi imaqarnersoq. Isumaqanngilanga naalakkersuisut inuiaqatigiinni imaluunniit suliffeqarfinni naalakkersuisullu akornanni avissaartuutsitsinermik sulisariaqartugut, suliassaqarpugut siunnerfii sumiinerpaamik piviusunngortiteriffigissallugit isumaqatigiissutigisarput najoqqutaralugu. Taamaammat massakkut tusatsiakkat najoqqutaralugit naalakkersuisut sulisussanngimmata suarsuttut mikisuarsuttutajoraluartumik taasariaqarput.

Naalakkersuisooqatigiinneq ajornartorsiorpa?

- Tassami ajornartorsiorpoq, pinerit tamaasa tusaatissatut tigusinnarlugu kisianni isumaqatigiinngileraanni oqartarneq, taanna naalakkersuisuni sulinermi atorsinnaanngilaq.

Qanoq piniarpisi?

- Takussavarput. Josef Motzfeldt, naalakkersuisooqatigiit ullaap tungaani ataatsimiinnissaannut iseriartortoq taama oqarpoq. Taava Aalisarnermut naalakkersuisoq Finn Karlsen aperaarput:

- Naalakkersuisuni siulittaasoq oqarpoq ullaaq utoqqatsersimasutit?

- Tassa qamani eqqartuisoqanngilaq, taamaallaat oqaloqatigiinnerput tunngavigalugu ilisimatitsivoq taavalu uanga ippassaq oqaaserisakka pappiaranngorlugit tunniunneqartut uannut tunniuppakka, tassa taakku ajuusaarutigalugu naalakkersuisunut paasiuminaatsumik oqarsimanera, tass’ taanna.

Utoqqatserpit?

- Utoqqatsernertut taaneqarsinnaanngilaq. Oqarpunga ajuusaarutigalugu aamma taakku ippassarli anereerpakka taavalu pappialanngorlugit tigummiakka taakkua taqqamani oqaaseqaatigeqquneqartut utoqqatsernermik imaqanngillat ajuusaarutigalugu nalunaarutigivara ippassarli.

Tassa utoqqatseqqusinera…..?

- Allamik oqaasissaqangnilanga tassunga tunngatillugu. Finn Karlsen oqarpoq.

Aalisarnermut Naalakkersuisoq Finn Karlsen taama oqarpoq. Naalakkersuisooqatigiit ukiup affaata ingerlanerinnaani immikkut ittumik ataatsimiisinneqartarput naalakkersuisooqatigiinnermi toqqissiunnaartitsisunik pisoqartarnera pissutigalugu.

Partiit naalakkersuisooqataasut naalakkersuisooqatigiit oqaatiginiagaat avaqqullugit oqaaseqartarneri pissutigalugit naalakkersuinikkut toqqissiveeruttoqartarpoq, qeqqanni Hans Enoksen ataniartitsisoralugu. Kingullertigullu aalisarnermut naalakkersuisup ammerivik pillugu oqaaseqartoq naalakkersuisut siulittaasuannit utoqqatseqquneqarpoq. Tamannali utoqqatserneruviunersoq suli ersarivinngilaq, oqartoqarmat utoqqatsertoqarsimasoq aammali oqartoqarluni ajuusaarutiginnittoqarsimasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat