Finn Karlsen unnerluutigineqassanngilaq

Aalisarnermut Piniarnermullu naalakkersuisoq Finn Karlsen Great Greenlandi pillugu nikanarsaasutut unnerluutigineqassanngilaq.

Finn Karlsenip, Great Greenlandip pisortaanut tunngatillugu oqaatsinik nikanarsaataasunik oqaaseqarsimanerarneqarnera iluamik uppernarsaatissaqanngimmat, suliaq unitsinneqartoq, Kalaallit Nunaanni Sulisitsisut Peqatigiiffiat GA, suliassanngortitsisuusoq, politiinit ilisimatinneqarpoq.

GA-p pisortaata Ole Rudip radioavisimut uppernarsarpaa Politimestereqarfimmit, politikerip eqqartuussisutigut malersorneqannginnissaanik imaqartunik, allagarsisimallutik.

- Nikanarsaatinik oqaaseqartoqarsimanera uppernarsaatissaqannginnerarpaat. Taamaappat soorunami suliaq ingerlateqqinneqarsinnaanngilaq, GA-p pisortaa oqarpoq.

Sulisitsisut Peqatigiiffiat februaarimi unnerluutiginnippoq, naalakkersuisup radioavisikkoorluni Ammeriviup Great Greenlandip pisortaa, Michael Nielsen, aningaasanik peqquserluuteqarsimasutut pisuutimmagu.

Finn Karlsenip taamani oqaasii, båndimut immiunneqanngitsut, issuarneqaannarput. Taamaattumik politiit suliap ingerlateqqinnissaa tunngavissaqarsorinngilaat, oqaatsit atorneqartut qanorpiaq issimaneri nalornissutaammata.

Suliap politiinit misissorneqarnerata nalaani Michael Nielsen Naalakkersuisut siulittaasuannit Hans Enoksenimit pisortatigoortumik utoqqatserfigineqarpoq.

Finn Karlsen pisumut atatillugu oqaaseqartinniaraluaratsigu iluatsitsinngilagut, Politimestereqarfimmit suli allagarsisimannginnini pillugu oqaaseqarusunngikkallarmat.